Դատապարտյալը «կարգի է հրավիրում» Արդարադատության խորհրդի կարգապահական հանձնաժողովին

«Աբովյան» քրեակատարողական հիմնարկում պատիժը կրող, խարդախության համար դատապարտված փաստաբան Կարինե Ավանեսյանը դատի է տվել  ՀՀ   Արդարադատության խորհրդի կարգապահական հանձնաժողովին   և պահանջում է վերացնել հանձնաժողովի  անգործությունը, պարտավորեցնել  վերջինիս  դատավոր Արմեն  Խաչատրյանի նկատմամբ կարգապահական վարույթ հարուցել:  Խոսքը  Երևանի Արաբկիր և Քանաքեռ-Զեյթուն վարչական շրջանների դատավոր Արմեն Տարիելի  Խաչատրյանի մասին է: Գործը մակագրվել է  ՀՀ վարչական  դատարանի դատավոր Քրիստինե  Մկոյանին: Այս մասին տեղեկացնում է «Փաստինֆոն»:

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`   դատավոր Արմեն Խաչատրյանի նախագահությամբ, 06.03.2013թ. դատավճռով   փաստաբան Կարինե Ավանեսյանին մեղավոր է  ճանաչել ՀՀ քրեական օրենսգրքի 178-րդ հոդվածի 3-րդ մասի 1-ին կետով՝  առանձնապես խոշոր չափերի խարդախության  համար, և դատապարտել նրան  ազատազրկման` 6 տարի 6 ամիս ժամկետով: Նրանից կբռնագրավվի նաեւ 16.296.580 ՀՀ դրամը չգերազանցող գույք:

Ըստ մեղադրանքի` 2009թ. նոյեմբեր ամսից մինչև 2010թ. փետրվար ամիսն ընկած ժամանակահատվածում նա  Գուրգեն  Հակոբյանից`  նրա որդու` դիտավորյալ սպանության համար դատապարտված ամբաստանյալ Կարեն  Հակոբյանի շահերը դատական ատյաններում պաշտպանելու համար, խաբեությամբ և վստահությունը չարաշահելու միջոցով վերցրել և խարդախությամբ տիրացել է 16.296.580 ՀՀ դրամին համարժեք 43.000 դոլար գումարին:

Բացի այդ, Կ. Ավանեսյանը խաբեության և վստահությունը չարաշահելու եղանակով անձնական կարիքները հոգալու համար 13.12.2008թ. նվիրատվություն ստանալով Աշոտ  Խաչատրյանին է ձևականորեն վաճառել Ժանետ  Արծրունյանին պատկանող 60.000.0000 ՀՀ դրամ արժողությամբ Երևան քաղաքի Նաիրի Զարյան 58 հասցեի անշարժ գույքը և խարդախությամբ տիրացել գումարին: