Սննդային էթիլ սպիրտն իրացրել են որպես ռուսական օղի
ՀՀ կառավարությանն առընթեր ՊԵԿ հայտնաբերել է կեղծ օղու հերթական խմբաքանակը։
Ըստ ՊԵԿ-ի՝ 2012թ. օգոստոսի 2-ին Վ.Պողոսյանը նախապես ձեռք է բերել սննդային էթիլ սպիրտ, այն ջրով բացել և «Символ России», «Знатная» և «Национальная валюта класик» տեսակի օղիների տարաների մեջ շշալցրել իր բնակարանում պատրաստած կեղծ օղին: Իսկ շշերի բկանցքերը փակել է իր կողմից նախապես ձեռք բերված թիթեղյա պտուտակաձև կափարիչներով:
Այնուհետև նույն օրը Վ.Պողոսյանը իր պատրաստած 100 շիշ 0,5լ. տարողությամբ կեղծ օղին փորձել է իրացնել Արմավիրի մարզի Տարոնիկ գյուղի բնակիչներից մեկին, սակայն իր կամքից անկախ հանգամանքներով պայմանավորված` չի հասցրել իրագործել:
Ձեռք բերված ապացույցների հիման վրա Վ.Պողոսյանին մեղադրանք է առաջադրվել ՀՀ քրեական օրենսգրքի 207-րդ հոդվածի 1-ին մասով՝ ալկոհոլային կեղծ խմիչք պատրաստելու և իրացնելու համար։ Դատախազությունը հաստատել է մեղադրական եզրակացությունն ու ուղարկել Արմավիրի մարզի ընդհանուր իրավասության առաջին ատյանի դատարան:
