Սաակաշվիլին դժգոհ է Հայաստանի պաշտոնատար անձանց վերջին հայտարարություններից
Վրացական «Ռուսթավի 2» հեռուստաընկերության ուղիղ եթերում Վրաստանի նախագահ Միխեիլ Սաակաշվիլին դժգոհություն է հայտնել Հայաստանի պաշտոնատար անձանց վերջին հայտարարությունների կապակցությամբ, որոնցում Աբխազիան հիշատակվել է որպես կայացած հանրապետություն.
«Դա բնականաբար չի բխում նախագահ Սերժ Սարգսյանից, սակայն պաշտոնատար անձանց մի մասն իրեն թույլ է տվել Աբխազիան հիշատակել որպես անկախ պետություն, ինչը հարուցում է մեր դժգոհությունը»:
Սաակաշվիլին հիշեցրել է, որ Հայաստանի նախագահի երդմնակալությանը հրավիրվել են Բաղրամյանի գումարտակի անդամները, որոնք Աբխազիայում մարտնչել են վրացական կառավարական զորքերի դեմ 1992-1993 թվականների վրաց-աբխազական հակամարտության ժամանակ:
Սաակաշվիլին իր վրդովմունք է հայտնել, որ Վրաստանի ԱԳՆ-ը ոչ մի կերպ չի արձագանքել դրան. «Ես հրաշալի հարաբերություններ ունեմ Հայաստանի առաջնորդի հետ: Իմ ղեկավարման տարիներին երկու երկրների միջև եղել են հիանալի հարաբերություններ: Սակայն հարցեր են առաջանում և անհրաժեշտ է ֆիքսել դիրքորոշում»:
