Հայաստանը «Երևակայության գավաթ»-ում կներկայացնի Lionsharp Solutions թիմը
Այսօր՝ ապրիլի 12-ին տեղի ունեցավ «Երևակայության գավաթ Հայաստան 2013» («Imagine Cup Armenia 2013») մրցույթի եզրափակիչ փուլը: Հայաստանյան ընտրության Եզրափակիչ փուլին մասնակցող 7 թիմերը կարճ (15 րոպե) շնորհանդեսների տեսքով ներկայացրեցին իրենց գաղափարները: Ներկայացված թիմերից ժյուրին ընտրեց մեկ հաղթող թիմ՝Lionsharp Solutions թիմը, որը և այս տարի հուլիսին Հայաստանը կներկայացնի մրցույթի համաշխարհային եզրափակչին, որը տեղի կունենա Ռուսաստանի Սանկտ Պետերբուրգ քաղաքում:
Ինչպես ավելի վաղ տեղեկացրել էր 168.am-ը, հենց այս թիմի ծրագրավորողները նախագծել էին յուրօրինակ մի նախագիծ. գրատախտակ՝ առանց կավճի կամ մարկերի. այն կառավարվում է միայն ժեստերի և ձայնային հրահանգների օգնությամբ: Մանրամասներին կարող եք ծանոթանալ այստեղ՝
Առաջին տեղը գրավեց Megamind team «Power talk»-ը՝ չաթի նոր համակարգ, որը ապահովված ձայնային հրահանգները հասկանալու ֆունկցիայով: Ինչպես 168.am-ի հետ զրույցում նշեցին թիմի անդամները հավելվածը հատկապես անհրաժեշտ է տեսողության խնդիրներ ունեցող մարդկանց համար, ովքեր կկարողանան ձայնով ղեկավարել չաթը:
Երկրորդ տեղը գրավեց miXoft team-ը, որը ներկայացրեց Paint the music project-ը, որը հնարավորություն է ընձեռում նկարել և միաժամանակ ստեղծել երաժշտական ստեղծագորություն: Թիմի անդամների խոսքով՝ դու նկարում ես, իսկ քո երաժշտությունը գրվում է:
Նշենք, որ մրցույթը Հայաստանում տեղի է ունենում արդեն 6-րդ անգամ: Ըստ կազմակերպիչների՝ այդ տարիների ընթացքում մրցույթին մասնակցող թիմերն բավականին առաջադիմություն են գրանցում՝ ոչ միայն հրաշալի գաղափարներ ներկայացնելով, այլ նաև դրանց տեխնոլոգիական լուծումներով և դրանք ներկայացնելու հմտություններով:
Նշենք, որ միջոցառումը կազմակերպել էին Հայաստանի Մայքրոսոֆթ ինովացիոն կենտրոնը, «Մայքրոսոֆթ ԱրԷյ» ընկերությունը և ԱՄՆ ՄԶԳ Ձեռնարկությունների զարգացման և շուկայի մրցունակության («Ի-Դի-Էմ-Սի») ծրագիրը:
