Իրանն ու Թուրքիան կարող են կնքել գազային նոր համաձայնագիր
Թուրքական Dünya Bülteni լրատվական գործակալության փոխանցմամբ՝ Թուրքիայի ու Իրանի էներգետիկայի նախարարություններն այսօր նոր բանակցություններ են անցկացնելու Թեհրանում: Թուրքական պատվիրակությունը Թեհրանում մասնկացում է էներգետիկ կոնֆերանսի, որին մասնակցում են նաև այլ երկրներ:
Կոնֆերանսի կուլիսներում թուրքական ու իրանական պատվիրակությունները բանակցում են նավթի ու գազի առուծախի շուրջ: Ակնկալվում է, որ բանակցությունների արդյունքում կողմերը ստորագրելու են նոր համաձայնագիր:
Բացի այդ, նշվում է, որ Թուրքիան ցանկանում է օրական 5 միլիոն խորանարդ մետրով ավելացնել Իրանից բնական գազի ներկրումը: Եթե դա տեղի ունենա, ապա Իրանն օրական Թուրքիա կարտահանի 35 միլիոն խորանարդ մետր գազ:
Հիշեցնենք, որ 1996 թվականին Իրանի ու Թուրքիայի միջև 25 տարով կնքված գազային համաձայնագրով Իրանը պարտավորվել է տարեկան Թուրքիային մատակարարել 10 միլիարդ խորանարդ մետր գազ:
