Թուրքիան եռափուլ վերահսկողություն է հաստատել Սիրիայի հետ սահմանին
Ռուսական Rosbalt լրատվական գործակալության փոխանցմամբ՝ Թուրքիայի իշխանությունները սկսել են ստուգման եռաստիճան համակարգ կիրառել Հաթայ նահանգի Ռեյհանլը շրջանի Ջիլվեգյոզու սահմանային անցակետում:
Փետրվարի 11-ին այդ անցակետում պայթել էր սիրիական համարներով մի ավտոմեքենա, ինչի հետևանքով զոհվել էր 9 սիրիացի և 3 թուրք, ինչպես նաև վիրավորվել էր 28 մարդ: Այժմ տրանսպորտային բոլոր միջոցներն ու անցորդները պետք է եռաշերտ ստուգում անցնեն բուֆերային գոտում՝ մինչև Թուրքիայի սահմանի հատումը:
Վերահսկողությունն իրենից ենթադրում է ռենտգենյան սարքավորման միջով անցնում, ավտոմեքենաների գրանցում և ստուգում, կասկածելի ավոտմեքենաների հավելյալ վերահսկողություն: Միայն այս բոլոր փուլերն անցնելուց հետո հերթը կհասնի անձնագրային վերահսկողությանն ու թուրքական սահմանի հատմանը:
