Վարդան Օսկանյանի որդին վկա է եղել, ոչ թե մասնակից
Այսօր ԶԼՄ-ներում տարածվել է մի տեղեկություն, որ ԱԺ պատգամավոր Վարդան Օսկանյանի որդի` Արման-Մինաս Օսկանյանը Երևանում ծեծկռտուքի մասնակից է եղել և կոտրել է մի երիտասարդի քիթը:
Ինչպես «Pastinfo.am»-ին տեղեկացնում են ոստիկանության լրատվական ծառայությունից, Վարդան Օսկանյանի տղան ականատես է եղել, բայց ոչ մասնակից, վերջինս հրավիրվել է ոստիկանություն և բացատրություն գրել:
Նույն աղբյուրի փոխանցմամբ, դեպքը տեղի է ունեցել 10 օր առաջ։ Մասնավորապես՝ հունվարի 4-ին՝ ժամը 04.35-ին «Նաիրի» բժշկական կենտրոնից ոստիկանության Արաբկիր բաժին հաղորդում է ստացվել այն մասին, որ քթոսկրի կոտրվածք ախտորոշմամբ իրենց մոտ բուժօգնության է դիմել 1976թ. ծնված Պատրիկ Զ.: Ձեռնարկված միջոցառումների արդյունքում պարզվել է, որ նույն օրը՝ ժամը 02։00-ին, Թամանյան և Իսահակյան փողոցների խաչմերուկում Պատրիկ Զ.-ն վիճաբանել է 1982թ. ծնված Էդգար Ն.-ի հետ: Վեճի ժամանակ վերջիններս ձեռքերով փոխադարձ հարվածներ են հասցրել միմյանց: Երկուսին էլ դատաբժիշկի ուղեգիր է տրվել, կատարվում է հետաքննություն:
