Արոնյանի ֆիասկոն ու Կարլսենի անհավանական ռեկորդը

Մեծ Բրիտանիայի մայրաքաղաքում ավարտվեց 2012 թվականի վերջին գերմրցաշարը, որին մասնակցում էին աշխարհի 3 ուժեղագույն գրոսմայստերները` Մագնուս Կարլսենը (Նորվեգիա), Լևոն Արոնյանը (Հայաստան) և Վլադիմիր Կրամնիկը (Ռուսաստան): London Chess Classic-ին մասնակցում էին նաև աշխարհի գործող չեմպիոն Վիշվանաթհան Անանդը (Հնդկաստան), ԱՄՆ-ի ուժեղագույն գրոսմայստեր Հիկարու Նակամուրան, բոլոր ժամանակների լավագույն շախմատիստուհի Յուդիթ Պոլգարը (Հունգարիա) և երեք անգլիացիներ` Լյուկ Մըքշեյնը, Մայքլ Ադամսն ու Գոուին Ջոնսը:

Լևոն Արոնյանն իր կարիերայի վատագույն մրցաշարերից մեկն անցկացրեց` 9 տուրում վաստակելով ընդամենը 8 միավոր (հաղթանակը գնահատվում է 3 միավոր, ոչ-ոքին` 1):  Առաջին տուրում Լևոնը սպիտակներով պարտվեց Նակամուրային, երկրորդ տուրում` Կարլսենին, երրորդ տուրում ոչ-ոքի խաղաց Անանդի հետ, չորրորդ տուրում հաղթեց Մըքշեյնին, մնացած պարտիաներն ավարտեց ոչ-ոքի արդյունքով և վաստակած 8 միավորով զբաղեցրեց 6-րդ տեղը:

Իսկ այն ինչ արեց Մագնուս Կարլսենը, դեռ երկար տարիներ ոչ ոքի չի հաջողվի կրկնել. նորվեգացին 5 հաղթանակ տարավ, 3 ոչ-ոքի խաղաց և, վաստակելով 18 միավոր, ոչ միայն դարձավ մրցաշարի միանձնյա հաղթող, այլև գերազանցեց Գարի Կասպարովի անհասանելի թվացող ռեկորդը: Մագնուսը դարձավ պատմության մեջ առաջին շախմատիստն, ով ՖԻԴԵ-ի վարկանիշային աղյուսակում հատեց 2851 միավորի շեմը, այժմ նա ունի 2861 ռեյտինգային միավոր:

Շատ հաջող մրցաշար անցկացրեց նաև Վլադիմիր Կրամնիկը. աշխարհի նախկին չեմպիոնը 16 միավորով զբաղեցրեց 2-րդ տեղը և վարկանիշային աղյուսակում շրջանցեց Լևոն Արոնյանին` 2810 ռեյտինգային միավորով բարձրանալով 2-րդ հորիզոնական :

Արոնյանն իր հերթին 12 վարկանիշային միավոր կորցրեց և այժմ 2803 միավորով գտնվում է ՖԻԴԵ-ի վարկանիշային աղյուսակի 3-րդ տեղում:

London Chess Classic-ի մրցաշարային աղյուսակի վերջնական տեսքն այսպիսին է.

1. Մագնուս Կարլսեն` 18 մ.

2. Վլադիմիր Կրամնիկ` 16 մ.

3. Մայքլ Ադամս` 13 մ.

4. Հիկարու Նակամուրա` 13 մ.

5. Վիշավանաթհան Անանդ` 9 մ.

6. Լևոն Արոնյան` 8 մ.

7. Յուդիթ Պոլգար` 6 մ.

8. Լյուկ Մըքշեյն` 5 մ.

9. Գոուին Ջոնս` 3 մ.

Մարզական լրահոսն ապահովում է SportArmenia.com-ը