Ամերիկյան ԿՀՎ-ի ղեկավարը պաշտոնաթող է եղել սիրուհու պատճառով
ԱՄՆ Կենտրոնական հետախուզական վարչության տնօրեն Դևիդ Պետրեուսը պաշտոնաթող է եղել։ Հետաքննությունների դաշնային բյուրոն (FBI) ներկայումս ուսումնասիրում է ԿՀՎ արդեն նախկին պետ Պետրեուսի և նրա սիրուհու՝ Փոլա Բրոդուելի կապերը։
Բրոդուելը համատեղության կարգով նաև Պետրեուսի կենսագիրն էր։ Քննիչներին անհանգստացնում է, որ նա կարող էր տիրապետել գաղտնի տեղեկատվության և Պետրեուսին շանտաժի ենթարկել։ Ինքը՝ Պետրեուսը, ինքնակամ թողել է պաշտոնը, թեպետ նախագահ Օբաման չէր պնդում դա անել։
Ընդունելով ԿՀՎ ղեկավարի հրաժարականը՝ Օբաման ասել է. «Ես լիովին վստահ եմ, որ ԿՀՎ-ն կշարունակի ծաղկել և իրականացնել իր առաքելությունը։ Եվ ես ամբողջությամբ վստահում եմ ԿՀՎ տնօրենի պաշտոնակատար Մայքլ Մորրելին ու այդ կառույցի բոլոր աշխատակիցներին, ովքեր ամեն օր ապահովում են մեր անվտանգությունը»։
ԶԼՄ-ների տվյալներով, հրաժարական տալու մտադրության մասին Պետրեուսը նախագահին հայտնել է դեռ հինգշաբթի օրը։ Որոշման առիթը եղել է այն, որ ԿՀՎ ղեկավարի սիրուհու մասին տեղեկատվությունը դարձել է հանրության սեփականությունը։
CNN հեռուստաընկերությունը, հղում անելով իր աղբյուրներին, տեղեկացրել է, որ իմանալով Պետրեուսի արտաամուսնական կապերի մասին՝ Հետաքննությունների դաշնային բյուրոն ստուգումներ է սկսել՝ «անվտանգության պոտենցիալ սպառնալիքներ» հայտնաբերելու համար։
Պետրեուսի սիրուհին՝ Փոլա Բրոդուելը, ԿՀՎ նախկին ղեկավարի ինքնակենսագրական գրքի (All In: Education of General David Petreaeus) համահեղինակն էր։ Նրանց կապի մասին վաղուց էին լուրեր շրջում։ Նրանք Աֆղանստանում միասին վազում էին՝ անցնելով բավական երկար հեռավորություն։
