Օհանջանյանը մսի կոմբինատը վաճառել է Մաքսիմ Հակոբյանին
«Բանակի պարենային պահեստում կատարված ստուգումների արդյունքում գոմեշի մսի հայտնաբերման փաստով հարուցված քրեական գործի շրջանակներում մեղադրանք է առաջադրվել Ալբերտ Անդրանիկի Օհանջանյանի դեմ՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով՝ խարդախություն, որը կատարվել է առանձնապես խոշոր չափերով»: Այդ մասին «Փաստինֆո»-ի թղթակցին հայտնել է ՀՀ ՊՆ քննչական ծառայության ավագ սպա Մերի Սարգսյանը:
Հիշեցնենք, որ 2012թ. հունիսին բանակի պարենային պահեստում ստուգումների արդյունքում հայտնաբերված խախտումների հիման վրա հարուցվել էր քրեական գործ՝ ՀՀ Քր. օրենսգրքի 178-րդ հոդվածի 3-րդ մասի 1-ի կետի հատկանիշներով:
Կատարվում է նախաքննություն:
Հավելենք, որ Ալբերտ Օհանջանյանը Կապանի Մսի կոմբինատի նախկին տնօրենն էր, ով մրցույթով հաղթող էր ճանաչվել բանակին մսամթերք տրամադրելու համար:
Սակայն, 168.am-ի տեղեկություններով` Ա. Օհանջանյանը մսի կոմբինատն ամիսներ առաջ վաճառել է «Զանգեզուր պղնձամոլիբդենային կոմբինատի» տնօրեն Մաքսիմ Հակոբյանին:
