Ախթալայի կոմբինատում խուսափում են հարցերից
Երեկ Ախթալայի ՀՀԿ-ական քաղաքապետ Հայկազ Խաչիկյանի ավտոմեքենայի ուղղությամբ արձակված կրակոցների առնչությամբ 168.am-ը փորձեց որոշ տեղեկություններ ստանալ Ախթալայի լեռնահարստացման կոմբինատի լրատվական բաժնից:
Նախնական տեղեկություններով` կրակողը եղել է Ախթալայի լեռնահարստացման կոմբինատի անվտանգության ծառայության պետ Արսեն Չիթչյանը: Կոմբինատի լրատվության պատասխանատու Լևոն Հովհաննիսյանը 168.am-ի հետ հեռախոսազրույցում նշեց, որ ինքը չի կարող որևէ մեկնաբանություն տալ կատարված դեպքի մասին, քանի որ տեղյակ չէ կատարվածից: Վերջինս նաև նշեց, որ մինչև սեպտեմբերի 12-ն ինքը գտնվում է արձակուրդում:
Իսկ կոմբինատի տնօրեն Մադլեն Թաշչյանի գործավարուհին` Սյուզին (այդպես ներկայացավ), 168.am-ի հետ հեռախոսազրույցում ասաց, որ ինքը չի կարող պատասխանել որևէ հարցի: Իսկ այն հարցին, թե այսօր Արսեն Չիթչյանն աշխատանքի գնացե՞լ է, գործավարուհին պատասխանեց, որ այդ մասին ավելի նպատակահարմար է ճշտել անվտանգության ծառայությունից: Իսկ կոմբինատի անվտանգության ծառայության դիսպետչեր Մհերն ընդամենը պատասխանեց, որ այսօր Արսեն Չիթչյանն աշխատանքի չի գնացել, իսկ կատարվածն էլ ասեկոսե է:
Հիշեցնենք, որ ՀՀ ոստիկանությունը քիչ առաջ հաղորդագրություն է տարածել, ըստ որի` «օգոստոսի 31-ին որոշումներ են կայացվել Էդգար Հախվերդյանին և Արսեն Չիթչյանին ՀՀ քրեական օրենսգրքի 185 հոդվածի 3-րդ մասի 1-ին կետով որպես մեղադրյալ ներգրավելու մասին, նրանց նկատմամբ հայտարարվել է հետախուզում և միջնորդություն է ներկայացվել դատարան՝ որպես խափանման միջոց կալանք կիրառելու մասին: Խուզարկությամբ Էդգար Հախվերդյանի տնից հայտնաբերվել է ինքնաշեն ատրճանակ, իսկ Արսեն Չիթչյանի տնից՝ 3 հատ փամփուշտ: Նշանակվել է դատաձգաբանական փորձաքննություն»:
