Ազնավուրը ելույթ կունենա Ախալցխայում
Աշխարհահռչակ ֆրանսահայ երգիչ Շառլ Ազնավուրը կմասնակցի Ախալցխայում վերականգնված Ռաբատ ամրոցի բացման առիթով կազմակերպվելիք տոնական համերգին: Այս մասին հայտնում է վրացական Грузия Online լրատվական գործակալությունը՝վկայակոչելով «Ռուստավի 2» հեռուստաալիքին:
Ազնավուրը օգոստոսի 16-ին ելույթ կունենա 25 հոգանոց երաժիշտների խմբի հետ և մոտ մեկ ու կես ժամ կկատարի իր հիթերը:
Վրաստանի իշխանությունները ամբողջովին վերականգնել են ամրոցը, որից ընդամենը ավերակներ էին մնացել: Աշխատանքները տևել են 10 ամիս: Այժմ ավարտին է մոտենում աշխատանքը ամֆիթատրոնում, որտեղ էլ հենց ելույթ կունենա Ազնավուրը:
Հիշեցնենք, որ Ազնավուրի ծնողները Ախալցխայից են, որը ներկայումս Վրաստանի կազմում գտնվող հայաշատ բնակավայրերից է:
