Աշխարհի ամենախոշոր սուպեր և հիպերմարկետները

Առևտրի կենտրոնի մասին մարդկանց պատկերացումներով՝ դա մի վայր է, որտեղ գնում են շաբաթը մեկ անգամ, կատարում են գնումներ: Հոծ բազմության միջով մի կերպ անցնելով սայլակներով՝ շտապում են տուն: Բայց սուպեր և հիպերմարկետների սեփականատերերն այլ պատկերացում ունեն առևտրի կենտրոնի մասին:

Նրանք իրենց կենտրոնները վերածում են զվարճանքի կենտրոնների, որտեղ, իհարկե, շատ կարևոր, բայց փոքր տեղ է հատկացված առևտրին:

Lenta.ru կայքը ներկայացնում է աշխարհի ամենատարօրինակ առևտրի կենտրոնները, որտեղ մարդիկ այցելում են ոչ միայն գնումներ կատարելու համար, այլև ժամանակ անցկացնելու նպատակով:

Dubai Mall-ը աշխարհի ամենախոշոր առևտրի կենտրոնն է: Դրա մակերեսը գերազանցում է 1.2 մլն քառակուսի մետրը: Այն ունի օլիմպիական չափերի հասնող սառցադաշտ, դահուկային ճանապարհ և 22 էկրաններով կինոթատրոն:

Dubai Mall-ում տեղակայված է աշխարհի ամենամեծ փակ ակվարիումը, որտեղ ապրում են ավելի քան 33 հազար ձկներ, նույնիսկ` շնաձկներ:

Գնումներից հոգնած հաճախորդները կարող են հանգստանալ`զբոսնելով ուղտի վրա նստած:

West Edmonton Mall-ը, որը գտնվում է կանադական Ալբերտում, համարվում է իր մեծությամբ հինգերորդն աշխարհում: Առևտրի կենտրոնի սրահում տեղակայված է Քրիստափոր Կոլումբոսի` իրական չափերին համապատասխանող նավերից մեկը, որով նա 1492թ. հաղթահարել է Ատլանտիկան:

Mall of America-ում` տեղակայված Մինեսոտայում, գտնվում է Nickelodeon մանկական հեռուստաալիքի հսկայական կարուսելը:

Berjaya Times Square երկնաքերում, որը գտնվում է Կուալա-Լումպուրում, կարելի է զվարճանալ` մասնակցելով տեղի ատրակցիոններին:

Նոր Տարուն Berjaya Times Square-ի բոլոր սրահները զարդարվում են ավանդական մալազիական ոճով:

Լաս Վեգասում գտնվող Venetian համալիրն ունի իր սեփական հյուրանոցը և խաղատունը, իսկ մարդիկ կարող են գոնդոլներով ջրի վրայով անցնել սրահներով:

Պատրաստեց Անի Գաբուզյանը