Ամերիկան Իրանից միայն ուսանողներ ու մշակութային գործիչներ կընդունի
Այն երկրների քաղաքացիները, որոնց իշխանությունները հրաժարվում են երկրի ներսում ահաբեկիչների վերաբերյալ տեղեկատվություն փոխանակել, լուրջ սահմանափակումների կհանդիպեն Միացյալ Նահանգներ այցելելիս: Այս մասին հաղորդում է «Ամերիկայի ձայնը»:
«Երկրները պետք է գոնե նվազագույն չափանիշների համապատասխան տեղեկատվություն փոխանակեն», – նշել է Սպիտակ տան մամլո խոսնակ Սարա Սանդերսը:
Նախագահ Դոնալդ Թրամփը հրամանագիր է ստորագրել, որի համաձայն Իրանի, Չադի, Լիբիայի, Հյուսիսային Կորեայի, Սոմալիի, Սիրիայի, Վենեսուելայի ու Յեմենի քաղաքացիները հոկտեմբերի 18-ից այլեւս չեն կարող ստանալ զբոսաշրջության կամ աշխատանքի վիզա, սակայն կարող են Միացյալ Նահանգներ ժամանել սովորելու կամ մշակութային փոխանակման շրջանակներում:
«Միացյալ Նահանգներ մուտքի արգելքը պետք է շատ ավելի կոշտ ու հասցեավորված լիներ, սակայն ավաղ, դա քաղաքականապես կոռեկտ չէր լինի», – գրել էր իր Թվիթերում Դոնալդ Թրամփը:
Ամերիկյան պաշտոնյաներն ընդգծում են, որ արգելքի պատճառն այն է, որ նշված երկրները հրաժարվում են տեղեկատվություն տրամադրել ահաբեկչության դեմ պայքարով զբաղվող գործընկերներին:
Իրանի արտգործնախարարությունն այնուամենայնիվ քննադատել է Թրամփի որոշումը:
«Սա անմարդկային, սխալ, անմիտ եւ անիմաստ գործողություն է», – ասել է Իրանի արտգործնախարարության խոսնակ Բահրամ Ղազեմին:
Որոշ իրանցիներ նշում են, որ ընդունված արգելքը բացասաբար է անդրադառնալու ոչ միայն Իրանի բնակիչների այլեւ՝ ԱՄՆ-ում բնակվող իրանցիների վրա.
«Բարեկամներս խնդիրներ կունենան։ Չնայած նրանք երկար տարիներ ԱՄՆ-ում են բնակվում, նրանք վախենում են Իրան այցելել, քանի որ, եթե այդ այցելությունից հետո նրանց թույլ չտան Միացյալ Նահանգներ վերադառնալ, ամբողջ կյանքը կքանդվի», – ասում է Թեհրանի բնակիչ Սադեղին:
Միացյալ Նահանգների պաշտոնյաները սակայն պնդում են, որ քանի դեռ Իրանի, Սիրիայի, Հյուսիսային Կորեայի եւ նշված մի շարք այլ պետությունների իշխանություններն ԱՄՆ-ին չեն տրամադրում ահաբեկչության վերաբերյալ տեղեկություններ, լուրջ սահմանափակումները Միացյալ Նահանգներ այդ երկրներից ժամանող ահաբեկիչների մուտքն արգելափակելու միակ ճանապարհն է:
