Վանաձորում վերելակի հորանն ընկած 14-ամյա երեխայի վիճակը ծանր է. նրան կվիրահատեն
Լոռու մարզի Վանաձոր քաղաքի Աղայան փողոցի թիվ 74/1 շենքի վերելակի հորանն ընկած 14-ամյա երեխայի առողջական վիճակը գնահատվում է կայուն ծանր: Այս մասին «Արմենպրես»-ին տեղեկացրեց «Սուրբ Աստվածամայր» բժշկական կենտրոնի Վերակենդանացման բաժանմունքի վարիչ Աննա Չոբանյանը:
«Նրա մոտ կա կրծքավանդակի սալջարդ, կոնքի երկու ոսկրի կոտրվածք և երկու ազդրի կոտրվածք: Նախատեսված է վիրահատություն` այսօր կամ վաղը, սպասում ենք առողջական վիճակի կայունացմանը: Այս պահին կարող եմ ասել, որ երեխան գիտակից է»,-նշեց Աննա Չոբանյանը:
ՀՀ արտակարգ իրավիճակների նախարարությունը մայիսի 30-ին, ժամը 18:37-ին տեղեկություն է ստացվել, որ երեխան ընկել է Լոռու մարզի Վանաձոր քաղաքի Աղայան փողոցի թիվ 74/1 շենքի վերելակի հորանը. անհրաժեշտ է փրկարարների օգնությունը:
Դեպքի վայր է մեկնել մեկ մարտական հաշվարկ: Մինչ փրկարարների՝ կանչի վայր հասնելը՝ 2003 թ. ծնված Լ. Զ.ը դուրս է բերվել հորանից, իսկ 2003 թ. ծնված Վ. Ա.ը՝ վերելակի խցիկից: Տուժածները հոսպիտալացվել են Վանաձոր քաղաքի ԲԿ, որտեղ բժիշկները Լ. Զ.ի առողջական վիճակը գնահատել են ծանր, իսկ Վ. Ա.ը ստանալով համապատասխան բուժօգնություն՝ դուրս է գրվել:
ՀՀ արտակարգ իրավիճակների նախարարությունը հայտնել էր, որ փորձաքննություն իրականացնելու նպատակով դեպքի վայրում է գտնվել «ՏԱԱԿ» ՊՈԱԿ-ի Լոռու մարզի տեխնիկական անվտանգության փորձաքննության բաժնի պետը:
