«Երևանում թե՛ ապրելը, թե աշխատելը բավականին հետաքրքիր է». Չինացիները պատրասվում են ներդրումներ իրականացնել ՀՀ-ում
Չինաստանի Հեյլունցզիան նահանգի ներկայացուցիչները պատրաստվում են լուրջ ներդրումային ծրագրեր իրականացնել Հայաստանում: Լրագրողների հետ հանդիպման ժամանակ այս մասին նշեց Հեյլունցզիան նահանգի միջազգային առևտրի աջակցման չինական կոմիտեի գլխավոր քարտուղար Գուան Հեյբինը՝ հավելելով, որ Հայաստանում անցկացրած երեք օրում մեծ տպավորություն է ստացել հայերի հետ շփումից:
«Մեծ տպավորություն եմ ստացել հայերի հետ շփումից: Երևանը հին պատմությամբ քաղաք է, և մարդիկ բարի են: Երևանում թե՛ ապրելը, թե աշխատելը բավականին հետաքրքիր է»,- ասաց Հեյբինը:
Ըստ նրա՝ համագործակցության բազմաթիվ ծրագրեր կարելի է իրականացնել Հայաստանի և Հեյլունցզիան նահանգի միջև: Հեյբինը նաև տեղեկացրեց, որ ՀՀ էկոնոմիկայի նախարարությունում հանդիպման ընթացքում պայմանավորվածություն է ձեռք բերվել լրագրողների փոխայցեր կազմակերպել ՝միմյանց մասին ավելի շատ տեղեկություններ ստանալու համար:
«Միջազգային գործարար կապերի աջակցության խորհուրդ» ՀԿ նախագահ Մարիամ Մանուկյանն իր հերթին ասաց, որ չինացի գործընկերներին հետաքրքրում են տուրիզմի, գյուղատնտեսության, ծառայությունների, տեղեկատվական տեխնոլոգիաների ոլորտները:
«Չինացի գործընկերները հետաքրքրված են ներդրումներ իրականացնել Հայաստանի գյուղմթերքների վերամշակման ձեռնարկություն ստեղծելու համար: Չինաստանում կկազմակերպվեն նաև ցուցահանդեսներ, որտեղ հայ գործարարների համար անվճար տաղավարներ կտրամադրվեն»,- նշեց Մանուկյանը:
Նա նաև հայտնեց, որ հոկտեմբերի 1-4-ը Չինաստանի Հարբին քաղաքից լրագրողներ են ժամանանելու Հայաստանի մասին հաղորդումներ պատրաստելու համար:
