«Բոլորին վիրավորում եք, դուրս եկեք դահլիճից… կլոունադա…». Ռոբերտ Նազարյանը՝ Անի Զախարյանին
ՀԾԿՀ նիստում իրեն բնորոշ վարքագծով այսօր աչքի ընկավ Անի Զախարյանը՝ ամեն րոպե փորձելով քաղաքական ելույթներ ունենալ: Նրա փորձերը հաջողությամբ կասեցնում էր ՀԾԿՀ նախագահ Ռոբերտ Նազարյանը:
Հերթական անգամ, երբ Անի Զախարյանը փորձեց ելույթ ունենալ, արժանացավ լրագրողների ծիծաղին, նրանց հետ լեզվակռիվ սկսեց: Ներկաներից մեկը լրագրողներին խորհուրդ տվեց դեմագոգիայի չտրվել:
«Մենք լռենք, դուք խոսեք»,- նկատեց Ռ.Նազարյանը:
ՀԾԿՀ նիստի դեմագոգիայի մասն ապահովեցին նաև ՕԵԿ-ի հեղինակած «Հայկական վերածնունդ» միության անդամներ «Հայկանդուխտ» և «Ազգային արժեքների պահպանություն» կուսակցությունները՝ հռետորական հարց հնչեցնելով, թե արդյոք ՀԾԿՀ-ն երբևէ որևէ օգուտ տվե՞լ է ժողովրդին:
Ռ.Նազարյանը հակադարձեց, որ «Մարդկային գործոն» հաղորդմանը չի մասնակցել. «Եկել եք ստեղ արդեն շուլուխ անելու»: Նա նշեց, որ ունեցել են դեպքեր, երբ սակագնի նվազեցում են իրականացրել՝ գազի, հեռահաղորդակցության դեպքում:
Անի Զախարյանը կրկին «վրդովվեց»՝ ասելով, թե անարգում են Նազարյանին իր իսկ նիստի ժամանակ:
«Որևէ մեկն ինձ անարգե՞լ է»,- զարմացավ Նազարյանը ու բարձրացած աղմուկը փորձեց կանխել՝ սաստելով՝ լռե՛ք:
Որոշ ժամանակ անց Անի Զախարյանը կրկին միջամտեց ու հայտարարեց, թե «կլոունադա» է, թույլ են տալիս «նման երևույթներին նման երևույթներով զբաղվել»:
«Բոլորին վիրավորում եք, դուրս եկեք դահլիճից… կլոունադա…»,- զայրացավ Ռ.Նազարյանը, բայց Անի Զախարյանը ոչ միայն դուրս չգնաց, այլև ելույթ ունեցավ:
