Թուրքիան խաղաղության ձեռք է պարզել Վատիկանին. թուրքական մամուլ
Թուրքական Son dakika լրատվական կայքի փոխանցմամբ՝ Թուրքիայի էկոնոմիկայի փոխնախարար Ադնան Յըլդըրըմը Հռոմի պապին հրավիրել է Միլանում անցկացվելիք EXPO 2015 ցուցահանդեսի թուրքական տաղավար:
Յըլդըրըմը հայտարարել է, որ իրենք չեն մոռացել Հայոց ցեղասպանության վերաբերյալ Հռոմի պապի արած հայտարարության մասին, ինչը չէր կարող երջանկացնել իրենց. «Պապն այնպիսի հայտարարություն արեց, որ կարծում եմ՝ սրանով կփոխհատուցի դա:
Թուրքիան ցույց է տվել, որ պատրաստ է միջազգային ամենաբարձր մակարդակով համագործակցության, որ պատրաստ է պատմաբանների առջև բացել իր պետական ու ռազմական արխիվները: Բացի այդ, մենք կիսում ենք բոլոր ազգերի ցավերը և այդ տեսանկյունից՝ բոլորին օբյեկտիվության կոչ ենք անում:
Պապին հրավիրում եմ թուրքական տաղավար, եթե ինքն էլ չգա, թող պատվիրակություն ուղարկի: Շատ եմ ցանկանում, որ նա կամ նրա պատվիրակությունը տեսնեն ու արժևորեն թուրքական պատմության հարստությունները, ինչն իր ներդրումը կունենա միջազգային խաղաղության մեջ»:
Վատիկանը դրական պատասխան է տվել Թուրքիայի պարզած խաղաղության ձեռքին:
