100 տարի առաջ վերապրած ցավերի փակված վերքերը վերաբացել փորձողները մարդկության դեմ հանցանք են գործում. Դավութօղլու
BBC-ի թուրքական ծառայության փոխանցմամբ՝ Թուրքիայի վարչապետ Ահմեդ Դավութօղլուն խորհրդարանի արտահերթ նիստում (Թուրքիայի խորհրդարանը հիմնվել է 1920 թվականի ապրիլի 23-ին) ունեցած ելույթում անդրադարձել է Հայոց ցեղասպանության հիմնախնդրին.
«Նրանք, ովքեր աշխատում են վերստին բացել 100 տարի առաջ վերապրած ցավերի փակված վերքերը, մարդկության դեմ հանցանք են գործում: Որպես 20-րդ դարի սկզբի պատերազմներում մեծապես վճարած ազգ՝ մերժում ենք մեր երկրի դեմ ուղղված զրպարտանքները»:
«Ազգայնական շարժում» կուսակցության նախագահ Դևլեթ Բահչելին իր հերթին՝ հայտարարել է. «Նրանք, ովքեր այս հայրենիքին հարվածում են ցեղասպանության պիտակով, որևէ հաջողության չեն հասնի: Թուրք ժողովուրդը ներկա պայմաններում արել է ամեն անհրաժեշտ բան»:
Թուրքիայի խորհրդարանի նախագահ Ջեմիլ Չիչեքն իր հերթին՝ հայտարարել է, որ Թուրքիան վերջին օրերին դարձել Հայկական սփյուռքի ու նրա հետևում կանգնած ուժերի ծավալած՝ Թուրքիային «զրպարտելու և վատաբանելու կամպանիայի զոհը»: Չիչեքը հայտարարել է, որ 1915 թվականին հայկական զինված ջոկատները «սպանել են երկրի հազարավոր քաղաքացիների»:
