Ուկրաինայում ցանկանում են փոխել քաղաքների ու փողոցների խորհրդային անունները
Ուկրաինական UNIAN լրատվական գործակալության փոխանցմամբ` Ուկրաինայում ապակոմունիզմացման մասին մշակված նոր օրենքը նախատեսում է վերանվանել ուկրաինական քաղաքների ու փողոցների խորհրդային անվանումները:
Մասնավորապես, դրա տակ են ընկնում Դնեպրոպետրովսկն ու Կիրովոգրադը, ինչպես նաև համապատասխան մարզերը: Այս մասին երեկ Facebook-ի իր էջում գրել է Ուկրաինայի ԿԸՀ-ի փոխնախագահ Անդրեյ Մագերան:
Ուկրաինայի Սահմանադրության համաձայն` Գերագույն ռադան օժտված է բնակավայրերը վերանվանելու լիազորություններով, նման որոշումներն ընդունվում են ձայների մեծամասնությամբ և ուժի մեջ են մտնում ընդունման օրը:
Գերագույն ռադային ներկայացված օրինագիծն ընդհանուր առմամբ նախատեսում է փոխել 25 քաղաքի պատմական անուն, այդ թվում նաև Դնեպրոձերժինսկը, Օրջոնիկիձեն, Սվերդլովսկը, Կրասնոարմեյսկը, Շչորսը, Ձերժինսկը, Արտյոմովսկը:
