Թուրքական մամուլն անդրադարձել է Քիմ Քարդաշյանի երևանյան այցին
Թուրքական մամուլն անդրադարձել է ամերիկահայ հեռուստաաստղ Քիմ Քարդաշյանի հայաստանյան այցին: Internet Haber լրատվական կայքը հայտնել է, որ Քիմ Քարդաշյանն ամուսնու` Քանյե Վեսթի և դստեր` Նորթհի հետ մեկնել է Հայաստան:
Այդ մասին են վկայել Լոս Անեջելեսի օդանավակայանում կատարված լուսանկարները: Ընդգծխվել է, որ դրանցում Քիմն աչքի է ընկել սև և երկար մազերով, ինչպես որ եղել է նախկինում: Ուշագրավ է հայկական ծագում ունեցող Քարդաշյանի այցի պատճառը. այն կապված է Հայոց ցեղասպանության 100-րդ տարելիցի հետ:
Օդանավակայանում լրագրողների հետ զրույցում Քիմը հայտարարել է. «Մենք այս ճամփորդությունը կատարում ենք` կապված 100 տարի առաջ թուրքերի կողմից հայերին սպանդի ենթարկելու հետ: Հայրս` Ռոբերտ Քարդաշյանը հայ էր, և երևանյան այս այցը շատ կարևոր է մեր ընտանիքի համար»:
Լրատվամիջոցը հայտնել է, որ Հայոց ցեղասպանության 100-րդ տարելիցի կապակցությամբ Երևան են մեկնելու նաև հանրահայտ փաստաբան Ամալ Քլունին, նրա ամուսին Ջորջ Քլունին ու Ռուսաստանի նախագահ Վլադիմիր Պուտինը:
Քարդաշյանի երևանյան այցին անդրադարձել է նաև Ստամբուլի հայկական «Ակօս» թերթը, որի հաղորդմամբ` Քարդաշյանների ընտանիքը Հայաստանում գտնվելու է 8 օր, ինչը ցուցադրվելու է Keeping Up With the Kardashians հեռուստաշոուով:
Թերթի հաղորդմամբ` Քարդաշյանների ընտանիքն այցելելու է Ծիծեռնակաբերդի հուշահամալիր և Հայոց ցեղասպանության թանգարան:
Թուրքական Superhaber հեռուստաալիքն իր հերթին հայտնել է, որ Քարդաշյանի հայաստանյան այցը կապված է «ցեղասպանության քարոզչության» հետ: Քարդաշյանի երևանյան այցին անդրադարձել են նաև թուրքական այլ լրատվամիջոցներ:
