2016 թվականին աշխարհի բնակչության 1 տոկոսը կլինի ավելի հարուստ, քան՝ մնացյալ 99 տոկոսը. Oxfam
BBC-ի փոխանցմամբ՝ մինչև 2016 թվականն աշխարհի ամենահարուստ բնակչության 1 տոկոսը կունենա ավելի մեծ կարողություն, քան՝ մոլորակի մնացյալ ողջ 99 տոկոսը: Այս մասին զգուշացրել է բրիտանական Oxfam բարեգործական կազմակերպությունը:
Վերջինս ներկայացրել է իր հետազոտության տվյալները, որոնք ցույց են տալիս, որ վերջին տարիներին ֆինանսական անհավասարակշռության աճը հասել է ապշեցուցիչ մասշտաբների: Տվյալները հրապարակվել են Շվեյցարիայի Դավոս քաղաքում կայանալիք Համաշխարհային տնտեսական ֆորումի անցկացման շեմին:
Oxfam-ի ղեկավար Ուինիի Բյանիման աշխարհի երկրների առաջնորդներին կոչ է արել պայքարել խոշոր կորպորացիաների կողմից հարկեր վճարելուց խուսափելու դեմ, ինչպես նաև օրենսդրորեն ամրագրել նվազագույն աշխատավարձն ու սպառողական զամբյուղը՝ եկամուտների առավել հավասարաչափ բաշխման համար:
