Արմեն Աշոտյանը հանդիպել է Ռումինիայի ազգային կրթության նախարարի հետ
«Բարձրագույն կրթության ապագան» Բոլոնյան գործընթացի հետազոտողների համաժողովին մասնակցելու նպատակով Ռումինիայում գտնվող ՀՀ կրթության եւ գիտության նախարար Արմեն Աշոտյանը հանդիպում է ունեցել Ռումինիայի ազգային կրթության նախարար Ռեմուս Պրիկոպիեի հետ: Վերջինս շնորհակալություն է հայտնել Արմեն Աշոտյանին իր հրավերն ընդունելու և Բուխարեստ ժամանելու համար, ինչպես նաև գոհունակություն հայտնել կրթության ոլորտում երկկողմ հարաբերություններում արձանագրված առաջընթացի համար՝ առանձնակի կարևորելով հայ համայնքի դերն այս գործում:
Արմեն Աշոտյանն իր հերթին շնորհակալություն է հայտնել ռումինացի գործընկերոջն ընդունելության համար` անդրադառնալով կրթության և գիտության ոլորտում հայ-ռումինական համագործակցության խնդիրներին: Նախարարն առանձնակի շեշտել է այդ հարաբերությունների խորացմանը նպաստող Բուխարեստի համալսարանում բացված հայոց լեզվի կենտրոնի, Կլյուժ-Նապոկա քաղաքի համալսարանում բացված հայագիտական ինստիտուտի, ինչպես նաև արևմտահայերեն և արևելահայերեն տպագրվող գրականության դերն այդ գործում:
Կողմերը քննարկել են նաև երկկողմ հետաքրքրություն ներկայացնող այլ հարցեր: Հանդիպման ավարտին Արմեն Աշոտյանը հրավիրել է Ռեմուս Պրիկոպիեին` մասնակցելու 2015 թվականին Երևանում կայանալիք Եվրոպական բարձրագույն կրթական տարածքի նախարարական գագաթաժողովին, որը Ռումինիայի ազգային կրթության նախարարն ընդունել է:
ՀՀ կրթության և գիտության նախարարություն
