ԱՄՆ Ներկայացուցիչների պալատը հավանության է արժանացրել սիրիացի ապստամբներին օգնելու պլանը
Ամերիկյան Associated Press լրատվական գործակալության փոխանցմամբ՝ ԱՄՆ Կոնգրեսի Ներկայացուցիչների պալատը հավանության է արժանացրել սիրիական չափավոր ընդդիմության համար սպառազինություն ու վարժանքներ ենթադրող պլանը:
Փաստաթղթի հեղինակը Ներկայացուցիչների պալատի՝ սպառազինության հարցերով հանձնաժողովի նախագահ, հանրապետական Հովարդ Մակկեոնն է: Այժմ այն պետք է հավանության արժանանա սենատորների կողմից և ստորագրվի նախագահ Բարաք Օբամայի կողմից:
ԱՄՆ Կոնգրեսի վերին պալատում (Սենատ) քվեարկությունը կարող է իրականացվել այսօր: Սրանից առաջ Պենտագոնի ներկայացուցիչները հայտարարել էին, որ եթե պլանը հավանության արժանանա Կոնգրեսում, ապա դրա իրագործումը կսկսվի 2015 թվականից:
Ակնկալվում է, որ վարժանքներում կներգրավվի 5000 սիրիացի: Վաշինգտոնը հուսով է, որ ծրագիրը կօգնի պայքարել «Իսլամական պետություն» խմբավորման ահաբեկիչների դեմ:
