«Ձեռներեցության կարողունակության զարգացում» ուսումնական ճամբարը մեկնարկել է
Օգոստոսի 22-ից 29-ը Գյումրու «Երիտասարդական նախաձեռնությունների կենտրոն» ՀԿ-ն «Վորլդ Վիժն» միջազգային բարեգործական կազմակերպության հայաստանյան մասնաճյուղի աջակցությամբ իրականացնում է «Ձեռներեցության կարողունակության զարգացում» խորագիրը կրող ուսուցողական ճամբար:
Ձեռներեցության կարողունակության զարգացման վերաբերյալ խաղարկային տարրերով ուսուցողական ճամբարը հիմնված է երկու թեմատիկ մոտեցումների վրա` կարիերայի կառավարում եւ ձեռներեցության զարգացում:
Ճամբարին մասնակցում են Մեծ Մասրիկ, Փոքր Մասրիկ, Լուսակունք գյուղական համայնքների և Վարդենիս քաղաքի պատանիները:
Ինչպես հաղորդում է Գյումրու «Երիտասարդական նախաձեռնությունների կենտրոն» ՀԿ-ն, ծրագրի նպատակն է աջակցել ձեռներեցության կարողունակության ձևավորմանը պատանիների շրջանում:
Ծրագրի ընթացքում նախատեսվում է մասնակիցներին տրամադրել ընդհանուր գիտելիքներ ձեռներեցության վերաբերյալ` ներառելով գործընթացների մանրամասները, խաղարկային վարժանքների միջոցով ապահովել հմտությունների և կարողությունների ձեռք բերման գործընթացը, աջակցել բիզնես գաղափարների գեներացիայի գործընթացին որպես մենթոր` հաղորդակից դարձնելով ձեռներեցության եւ սոցիալական ձեռներեցության մոտեցումներին:
