Վրաստանում ավարտվել է ամենաթողտվության ու անպատժելիության ժամանակաշրջանը. Գարիբաշվիլի
Новости-Грузия լրատվական գործակալության փոխանցմամբ՝ Վրաստանի վարչապետ Իրակլի Գարիբաշվիլին, մեկնաբանելով նախկին նախագահ Միխեիլ Սաակաշվիլու դեմ նոր մեղադրանքները, հայտարարել է, որ Վրաստանում ավարտվել է ամենաթողտվության ու անպատժելիության ժամանակաշրջանը.
«Ինչպե՞ս մերսուղուհու ծառայություններն ու միլիոնների հասնող բազում վատնումները կարող են ընկալվել որպես նորմա: Դա բացառված է: Ես ցանկանում եմ ևս մեկ անգամ հայտարարել, որ Վրաստանում ավարտվել է ամենաթողտվության ու անպատժելիության ժամանակաշրջանը:
Բոլորը պատասխան կտան անհրաժեշտ ձևով, և բոլոր քաղաքացիները հավասար կլինեն օրենքի առջև՝ լինի դա վարչապետ, նախագահ, խորհրդարանի նախագահ կամ այլ պաշտոնյա»: Վրաստանում Սաակաշվիլու նկատմամբ հայտարարվել է ներքին հետախուզում:
