Ներկայիս ցնցումներն ու զոհերն Արևմուտքի անպատասխանատու քաղաքականության հետևանք են. Յանուկովիչ
![](https://168.am/wp-content/uploads/2014/02/download25.jpg)
Ուկրաինական UNIAN լրատվական գործակալության փոխանցմամբ՝ Ուկրաինայի նախկին նախագահ Վիկտոր Յանուկովիչը Դոնի Ռոստովում ընթացող մամուլի ասուլիսի ժամանակ հայտարարել է, որ ներկայիս ցնցումները և զոհերը քաղաքական ճգնաժամի հետևանքներն են, Արևմուտքի անպատասխանատու քաղաքականության հետևանք են, որը խրախուսել է «Մայդանին».
«Սակայն Ուկրաինան ուժեղ երկիր է, և մենք անպայմանորեն դուրս կգանք ստեղծված իրավիճակից: Պետք է կազմակերպել զենքի անհապաղ հանձնումը ներքին գործերի մարմիններին: Զինված անձինք պետք է հեռանան փողոցներից: Ուկրաինայում պետք է ապահովել քաղաքացիների նորմալ կյանք:
Պետք է անցկացնել հանցագործությունների անկողմնակալ հետաքննություն: Պետք է հաշվի առնել Ուկրաինայի բոլոր շրջանների շահերը: Մենք պետք է դուրս գանք այս ճգնաժամից, որում հայտնվել է երկիրը»:
Յանուկովիչն առաջարկել է մոտ ժամանակներս անցկացնել համազգային հանրաքվե: Յանուկովիչը հայտարարել է, որ Գերագույն ռադան լեգիտիմ չէ, և որ ինքը չի մասնակցելու մայիսի 25-ին նշանակված նախագահական ընտրություններին, որոնց անցկացումը որակել է որպես «ապօրինի»: