Բրյուսելում ակնկալում են, որ Ուկրաինայի նոր վարչապետ կդառնա Յացենյուկը
![](https://168.am/wp-content/uploads/2014/02/1390494497-98271.jpg)
Ուկրաինական UNIAN լրատվական գործակալության փոխանցմամբ՝ Եվրախորհրդարանի երկու հատուկ պատվիրակություններ նոր են վերադարձել Ուկրաինայից, ուր բանակցություններ են վարել քաղաքական գործընթացի առանցքային մասնակիցների հետ:
Վերադառնալուց հետո այդ պատվիրակությունների ղեկավարները հայտարարել են, որ ամենայն հավանականությամբ Ուկրաինայի հաջորդ վարչապետը կլինի «Բատկիվշչինայի» առաջնորդ Արսենի Յացենյուկը:
Եվրախորհրդարանի՝ արտաքին հարցերով հանձնաժողովի նախագահ Էլմար Բրոկն ու պատվիրակության փոխնախագահ, պորտուգալացի եվրապատգամավոր Անա Գոմեշն այդ մասին հայտարարել են Ստրասբուրգում Եվրախորհրդարանի նստաշրջանի ժամանակ.
«Մենք Կիևում հանդիպել ենք քաղաքական բոլոր առանցքային խաղացողների հետ: Մենք հանդիպել ենք հաջորդ վարչապետի հետ, որը հավանաբար լինելու է Յացենյուկը: Ամենայն հավանականությամբ, հենց Յացենյուկը կլինի ժամանակավոր կառավարության հաջորդ վարչապետը»:
Նշվում է, որ 12 պատգամավորից բաղկացած Եվրախորհրդարանի պատվիրակությունները Կիևում գտնվել են փետրվարի 22-24-ին: