Օբաման չմիջամտելու զգուշացում է արել Ուկրաինայի զինվորական վերնախավին
Ռուսական РИА Новости լրատվական գործակալության փոխանցմամբ՝ Մեքսիկայում գտնվող ԱՄՆ-ի նախագահ Բարաք Օբաման դատապարտել է Ուկրաինայի բռնությունները և Կիևին զգուշացրել է հնարավոր պատժամիջոցների մասին, եթե շարունակվեն բռնությունները.
«ԱՄՆ-ը բռնությունները դատապարտում է ամենակտրուկ ձևով: Մենք սերտորեն աշխատում ենք եվրոպացի գործընկերների ու Ուկրաինայի կառավարության ու ընդդիմության հետ, որպեսզի փորձենք վերջ դնել բռնություններին»:
Օբաման զգուշացրել է, որ («կարմիր») գծերը հատելու դեպքում կլինեն հետևանքներ: Բացի այդ, նա Ուկրաինայի բանակին զգուշացրել է չմիջամտել այն հարցերին, որոնք պետք է լուծեն քաղաքացիական անձինք:
Օբաման ստեղծված իրավիճակի համար պատասխանատու է համարել առաջին հերթին Ուկրաինայի կառավարությանը: Օբաման հայտարարել է, որ ԱՄՆ-ը շարունակելու է աջակցել Ուկրաինայի եվրաինտեգրմանը և ակնդետ հետևելու է ուկրաինական զարգացումներին:
