Պետդեպարտամենտի ղեկավարը հայտարարել է, որ Պուտինը չի կարողանա հաղթել Ուկրաինայի դեմ պատերազմում

Ուկրաինայում պատերազմը չի ավարտվի Ռուսաստանի հաղթանակով, քանի որ ռազմաճակատում ռուսական բանակի գործերը վատ են ընթանում, հայտարարել է Պետդեպարտամենտի ղեկավար Մարկո Ռուբիոն։ «Այս պատերազմը վնասակար է երկու կողմերի համար։ Ակնհայտ է, որ այն վնասում է Ուկրաինային և կործանարար է Ռուսաստանի համար։ Այդ պատճառով այն կանգնեցնելը լիովին տրամաբանական է։ Բայց, ցավոք, արտաքին քաղաքականության մեջ և նման հարցերում միշտ չէ, որ տեղի է ունենում այն, ինչ իմաստ ունի», — ասել է Ռուբիոն WABC ռադիոկայանին տված հարցազրույցում։

Նրա խոսքով՝ ռազմական գործողությունները ի վերջո կավարտվեն բանակցությունների միջոցով։ «Եվ որքան շուտ դա տեղի ունենա, այնքան քիչ մարդիկ կզոհվեն և այնքան քիչ ավերածություններ կլինեն», — ընդգծել է Ռուբիոն։ Նա վստահեցրել է, որ ԱՄՆ նախագահ Դոնալդ Թրամփի վարչակազմը կշարունակի փորձել լուծել Ուկրաինայի և Ռուսաստանի միջև առկա տարաձայնությունները, սակայն ընդունել է, որ այսօրվա դրությամբ Մոսկվան և Կիևը հեռու են խաղաղության համաձայնագրից։ Նախօրեին Ուկրաինայի նախագահ Վլադիմիր Զելենսկին Նյու Յորքում բանակցություններ է վարել ամերիկացի առաջնորդ Թրամփի հետ։ Հանդիպման ժամանակ Սպիտակ տան ղեկավարը հայտարարել է Ռուսաստանի և Ուկրաինայի միջև «գործարքի» հնարավորությունների մասին։ «Ես չեմ ուզում ասել, թե այն կոնկրետ ինչ է ներառելու։ Մենք դա շատ ենք քննարկում, այդ թվում՝ նախագահ Պուտինի հետ», — ասել է Թրամփը՝ հավելելով, որ պատերազմն ավարտելու համար «ժամանակն եկել է»։

Զելենսկին, իր հերթին, ասել է, որ Կիևն ու Վաշինգտոնը ցանկանում են առաջիկա ձմեռվանից առաջ ավարտել «անիմաստ ռուսական պատերազմը»։ «Մենք քննարկել ենք հնարավոր դեէսկալացիոն քայլերը, որոնք կարող են ճանապարհ բացել դիվանագիտության համար», — նշել է Ուկրաինայի նախագահը։ Զելենսկին նաև հայտնել է, որ ԱՄՆ-ն Ռուսաստանին կփոխանցի էներգետիկ հրադադարի առաջարկը։ «Մենք պատրաստ ենք դադարեցնել հարվածները նրանց նավթավերամշակման գործարաններին և էներգետիկ համակարգին, եթե նրանք հարվածներ չհասցնեն մերին», — ասել է Զելենսկին։ Նա նաև հույս է հայտնել, որ ԱՄՆ-ն կգտնի միջոց՝ հասնելու նրան, որ Ռուսաստանը բանակցի Ուկրաինայի հետ։