Ուկրաինայի զինված ուժերը կրկին գրոհել են Խերսոնի մարզի կամուրջները
Ուկրաինայի զինված ուժերը գրոհել են Խերսոնի մարզի՝ Չոնգարի և «Արաբատսկայա ստրելկայի» ուղղությամբ կամուրջները։ Այս մասին հայտնել է մարզպետ Վլադիմիր Սալդոն:
«Գիշերային հարձակման հետևանքով կրկին վնասվել է Չոնգարի մոտ գտնվող կամուրջը։ «Ջանկոյ» անցակետով երթևեկությունն ամբողջությամբ արգելափակված է»,-գրել է Սալդոն Telegram-ալիքում։
Նրա խոսքով՝ գիշերը հարվածներ են հասցվել Գենիչեսկը «Արաբատսկայա ստրելկային» միացնող կամրջին։
«Երթևեկությունը փակ է։ Պահպանվում է դրոնային վտանգը, ուստի մասնագետները ձեռնամուխ կլինեն վնասի աստիճանի գնահատմանը օպերատիվ ծառայությունների թույլտվությունից անմիջապես հետո: Հակառակորդը նպատակաուղղված հարվածում է տրանսպորտային ենթակառուցվածքներին, որպեսզի խնդիրներ ստեղծի մարդկանց համար», – նշել է Սալդոն։
Նա նշել է, որ երթևեկության վերաբերյալ տեղեկատվությունը կտրամադրվի լրացուցիչ։
Նշենք, որ Ուկրաինայի զինված ուժերը հունիսի 11-ի գիշերը հարվածներ են հասցրել նաև Խերսոնի մարզի կամուրջներին:
