ԱՄԷ-ն դատապարտել է «Քուվեյթի դեմ իրանական հարձակումները»
Արաբական Միացյալ Էմիրությունների նախագահի դիվանագիտական խորհրդական, դոկտոր Անվար Մուհամմեդ Գարգաշը դատապարտել է «Քուվեյթի դեմ իրանական շարունակվող դաժան հարձակումները»։ Նա հայտարարել է, որ լարվածության այս սրացումը սպառնում է տարածաշրջանային անվտանգությանն այնպիսի պահի, երբ դիվանագիտական ջանքերը կենտրոնացած են հակամարտությունների դադարեցման և ամբողջ տարածաշրջանում կայունության վերականգնման վրա, հաղորդում է Gulf News-ը։
X սոցիալական ցանցի իր էջում կատարած հրապարակման մեջ Գարգաշը նշել է, որ այս լարվածության սրացումը «ինքնիշխանության և միջազգային իրավունքի խախտում է՝ մի անընդունելի մոտեցում, որը խաթարում է տարածաշրջանը պատերազմների ու ճգնաժամերի նոր փուլերից զերծ պահելուն ուղղված ընթացիկ ջանքերը»։
«Դատապարտում ենք եղբայրական Քուվեյթի Պետության դեմ իրանական շարունակվող դաժան հարձակումները: Այն ժամանակ, երբ տարածաշրջանը նուրբ ջանքեր է գործադրում պատերազմների ու ճգնաժամերի շրջափուլից դուրս գալու համար, լարվածության այս սրացումը և ինքնիշխանության ու միջազգային իրավունքի խախտումը ցույց են տալիս անընդունելի մոտեցում, որը խաթարում է անվտանգության և կայունության պահպանման ջանքերը»,- հայտարարել է Գարգաշը:
«Մենք ամբողջ սրտով կանգնած ենք եղբայրական Քուվեյթի կողքին և վերահաստատում ենք, որ նրա անվտանգությունը մեր անվտանգությունն է: Այս լուրջ հարձակումները ուղղակի սպառնալիք են տարածաշրջանի և նրա կայունության համար»,- հավելել է նա։
