Իսլամաբադում Իրանի և ԱՄՆ-ի միջև հանդիպում չի նախատեսվում. Բաղայի
Իսլամաբադում Իրանի և ԱՄՆ-ի միջև հանդիպում չի նախատեսվում, Թեհրանի դիրքորոշումը կփոխանցվի Իսլամաբադին. X սոցիալական ցանցում գրել է Իրանի ԱԳՆ պաշտոնական ներկայացուցիչ Էսմայիլ Բաղային։
Ըստ նրա, իրանական պատվիրակությունը պաշտոնական այցով է ժամանել Պակիստանի մայրաքաղաք։
«Արտաքին գործերի նախարար Արաղչին կհանդիպի Պակիստանի բարձրաստիճան պաշտոնյաների հետ՝ Ամերիկայի կողմից պարտադրված ագրեսիվ պատերազմը դադարեցնելու և մեր տարածաշրջանում խաղաղությունը վերականգնելու նպատակով իրականացվող շարունակական միջնորդության և բարի կամքի դրսևորման շրջանակում»,- նշել է Բաղային։
Ավելի վաղ Իրանի ԱԳ նախարարը մեկնել էր Պակիստան։
Իր հերթին Սպիտակ տունը հայտարարել է, որ ԱՄՆ հատուկ բանագնացներ Սթիվ Ուիթքոֆը և Ջարեդ Քուշները կմեկնեն Պակիստան՝ իրանական պատվիրակության հետ ուղիղ բանակցություններ վարելու համար։
