Ռուսաստանի և Նոր Նախիջևանի Հայոց թեմի հոգևորականները հավատարմությամբ են կանգնած Եկեղեցու ու վեհի կողքին՝ բացառությամբ Գևորգ Սրբազանի եղբոր
Հայ Առաքելական եկեղեցու Ռուսաստանի և Նոր Նախիջևանի թեմի հոգևորականներն այսօր ուղերձով իրենց հավատարմությունն են հայտնել Մայր Աթոռ Սուրբ Էջմիածնին և նրա գահակալին:
Թեմից Տեր Արիստակես քահանա Հովհաննիսյանը քիչ առաջ գրառմամբ արձանագրել է. «Թեմի հոգևորականները, բացառությամբ Մոսկվայի Սբ. Պայծառակերպություն եկեղեցու հոգևոր սպասավոր Տեր Հակոբ քհն. Սարոյանի, միակամ հայտնում են, որ անսասան ու անվերապահ հավատարմությամբ կանգնած են Մայր Աթոռ Սուրբ Էջմիածնի, նրա ուխտապահ հոգևորականության և Սբ. Գրիգոր Լուսավորչի գահի ազգընտիր հայրապետ Գարեգին Բ Ամենայն Հայոց Կաթողիկոսի, ինչպես նաև ՀՀ իշխանությունների կողմից բանտարկված հոգևորականների կողքին»:
Մեր ընթերցողին հիշեցնենք՝ Տեր Հակոբ քահանա Սարոյանը Վեհափառին անհնազանդություն հայտնած, Կառավարությունում այդ անհնազանդությունը ձեռքսեղմումով ամրապնդած Մասյացոտն թեմի առաջնորդ Գևորգ եպիսկոպոս Սարոյանի եղբայրն է:
Տեր Հակոբի պահվածքը, ինչպես և Գևորգ Սրբազանի քայլը չափազանց առեղծվածային է մնում, քանի որ Գևորգ Սրբազանն ընդամենն ամիսներ առաջ արցունքներով էր պաշտպանում Մայր Աթոռը ԱԱԾ-ականների ու ոստիակնների ներխուժումից, իսկ նրա եղբայրն ընդամենը օրեր առաջ՝ նոյեմբերի 4-ին միացել էր Վեհափառ Հայրապետի գահակալության առթիվ թեմի ուղղած տեսաուղերձին: Ավելին, ինչպես տեղեկանում ենք, Տեր Հակոբը չափազանց սկզբունքային է եղել հայ ժողովրդի միասնականությունը խոչընդոտող հարցերի պարագայում և հավատարմություն հայտնել Վեհափառ հոր դիրքորոշմանը։
Ամեն դեպքում, նա այսօր շարունակում է ծառայել Մոսկվայում՝ Վեհափառ Հայրապետի եղբոր՝ Եզրաս արքեպիսկոպոս Ներսիսյանի առաջնորդությամբ, ինչը ցույց է տալիս մեր եկեղեցու դեմոկրատական վերաբերմունքը. անգամ իր եղբորը խոցողի եղբոր հանդեպ է թեմակալ առաջնորդը բարեգութ:
