Կարգալույծ լրտեսը դառնում է «աստղ»․ Փաշինյանը պլանավորո՞ւմ է «առաջ մղել» Ասատրյանին կաթողիկոսի պաշտոնի համար․ МК

Էջմիածնի մայր տաճարում տեղի ունեցավ պատարագ՝ նվիրված Ամենայն հայոց կաթողիկոս Գարեգին Բ-ի օծման և գահակալության 26-ամյակին: Կաթողիկոսը, ի թիվս այլ թեմաների, աղոթք մատուցեց Բաքվում գտնվող հայ բանտարկյալների, Հայաստանում ձերբակալված արքեպիսկոպոսների և բանտարկված գործարար Սամվել Կարապետյանի համար: Միաժամանակ՝ կարգալույծ վանական Ստեփան Ասատրյանն իր սեփական «պատարագն» է մատուցել Հովհաննավանքում, որին մասնակցել են վարչապետ Նիկոլ Փաշինյանը և Ազգային ժողովի խոսնակ Ալեն Սիմոնյանը․ գրել է Московский Комсомолец-ը։

Ինչպես նշվել է, Հովհաննավանքում միջոցառումը տեղի է ունեցել Փաշինյանի նորաստեղծ ոստիկանական պահակախմբի անդամների խիստ հսկողության ներքո, ովքեր նախորդ շաբաթ օրը ավտոբուսով տեղափոխվել էին վանքին ամենամոտ գտնվող Հայաստանի Արագածոտնի մարզի Օհանավան գյուղ։

Կայքը հիշեցրել է, որ Ասատրյանը կարգալույծ է արվել հոկտեմբերի 21-ին Հայ առաքելական եկեղեցու (ՀԱԵ) կարգապահական կոմիտեի կողմից իր հրապարակային հայտարարությունների համար, որոնք, ըստ կոմիտեի, վարկաբեկում են եկեղեցին և նրա հոգևորականներին: Նա փաստացի գործել է որպես լրտես, ինչի հետևանքով՝ հոկտեմբերի կեսերին ձերբակալվել են ՀԱԵ-ի Արագածոտնի թեմի 13 հոգևորականներ և երեք աշխարհիկներ: Ձերբակալվածների թվում էր թեմի առաջնորդ, Մկրտիչ եպիսկոպոս Պռոշյանը (Կաթողիկոսի քրոջ որդին): Երեք ձերբակալվածների, այդ թվում՝ եպիսկոպոսի դեմ առաջադրվել են քրեական մեղադրանքներ: Այս իրադարձություններից մեկ ամիս առաջ՝ սեպտեմբերի 16-ին, Արագածոտնի թեմի այն ժամանակվա քահանա Ասատրյանը Հանրային հեռուստատեսության հետ զրույցում հայտարարել էր, որ թեմի առաջնորդն իրեն և այլ քահանաների 2021 թվականին ստիպել է մասնակցել ընդդիմության բողոքի ցույցերին:

МК-ն նշել է, որ բողոքի ցույցերը Հայաստանում սկսվել են 2020 թվականի նոյեմբերի 10-ին՝ Լեռնային Ղարաբաղում հրադադարի համաձայնագրի ստորագրումից հետո։ Հազարավոր մարդիկ դուրս են եկել Երևանի և Հայաստանի այլ քաղաքների փողոցներ՝ պահանջելով Փաշինյանի հրաժարականը։ Այս պահանջին աջակցել է Հայ առաքելական եկեղեցու ղեկավարությունը։ Այնուամենայնիվ, Փաշինյանին հաջողվել է պահպանել իշխանությունը. 2021 թվականի մարտի 18-ին նա նշանակել է արտահերթ խորհրդարանական ընտրություններ, որոնցում հաղթել է նրա կուսակցությունը։

Հայկական ներկայիս իշխանությունների կողմից Ղարաբաղի վերջնական հանձնումից հետո Տավուշի թեմի առաջնորդ Բագրատ Գալստանյանը փորձել է կասեցնել տարածքային հետագա զիջումները:

Կայքը նաև հիշեցրել է, որ Փաշինյանն այս տարվա մայիսի վերջին բացահայտ հարձակում է սկսել Հայ առաքելական եկեղեցու դեմ՝ սոցիալական ցանցերում վիրավորական գրառումներ հրապարակելով և թիրախավորելով եկեղեցուն ու անձամբ Կաթողիկոսին։

ՀՀ վարչապետի «գարնանային բռնկումը» տեղի է ունեցել Գարեգին Բ կաթողիկոսի՝ Շվեյցարիայում Եկեղեցիների համաշխարհային խորհրդի համաժողովում ունեցած ելույթից հետո: Էջմիածնի նախաձեռնությամբ անցկացված համաժողովում քննարկվել է Ղարաբաղում հայկական հոգևոր, մշակութային և պատմական ժառանգության պահպանման հարցը:

Ինչպես նշվել է, կարգալույծ քահանա Ասատրյանն արագորեն է կողմնորոշվել ներկայիս քաղաքական դաշտում. նա արագ փոխել է Հովհաննավանքի դռան կողպեքը, հրաժարվում է բանալին որևէ մեկին տալ և այժմ այնտեղ «պատարագներ» է անցկացնում, որոնք վարելու իրավունք չունի։ Սակայն դրանց մասնակցում են երկրի բարձրագույն ղեկավարները։ Առաջին նման «պատարագը» տեղի է ունեցել անցյալ կիրակի։ Կարգալույծ լրտեսը դառնում է «աստղ»։ «Գուցե Փաշինյանը պլանավորու՞մ է նրան «առաջ մղել» կաթողիկոսի պաշտոնի համար։ Այս հնարավորությունը Հայաստանում բացարձակապես չի բացառվում։ Մինչդեռ, Մայր Աթոռ Սուրբ Էջմիածինը հայտարարություն է տարածել, որում կոչ է անում «վերաօծել» «կրոնական արարողությունների քողի տակ իրականացված» գործողություններով պղծված Հովհաննավանքը», – գրել է կայքը։

Հրապարակման պատրաստեց abcmedia.am-ը։