Իսրայելը հերքել է պոլիոմիելիտի պատվաստումների համար հրադադար հաստատելու մասին լուրերը
ՄԱԿ-ի Մերձավոր Արևելքում պաղեստինցի փախստականների օգնության և աշխատանքների կազմակերպման գործակալությունը կոչ է արել ժամանակավոր հրադադար հաստատել Գազայում՝ պոլիոմիելիտի դեմ երեխաների պատվաստում անցկացնելու համար:
Իր հերթին Իսրայելը հերքել է պատվաստումների համար հնարավոր հրադադար հաստատելու մասին տարածված լուրերը։
ՄԱԿ-ի գործակալությունը X սոցիալական ցանցում հայտնել է, որ հարկավոր է Գազայի հատվածում պոլիոմիելիտի դեմ պատվաստման լայնածավալ արշավ անցկացնել հնարավորինս շուտ։ «Որպեսզի դա տեղի ունենա, մեզ մարդասիրական դադար է անհրաժեշտ:
Մենք չենք կարող երեխաներին պատվաստել ռումբերով և հրթիռներով լի երկնքի ներքո: Մեզ մարդկայնություն է անհրաժեշտ», – ասված է հայտարարության մեջ:
Գործակալությունը պատվաստման է նախապատրաստվում ՅՈՒՆԻՍԵՖ-ի և Առողջապահության համաշխարհային կազմակերպության (ԱՀԿ) հետ համատեղ։
Ավելի վաղ պատվաստումների համար հրադադար հաստատելու կոչ էր արել ԵՄ դիվանագիտության ղեկավար Ժոզեպ Բորելը։
Այդ առնչությամբ Իսրայելի վարչապետ Բենիամին Նեթանյահուի գրասենյակը հերքել է Channel 13 հեռուստաալիքի տեղեկատվությունը Գազայի հատվածում ռազմական գործողությունների դադարեցման վերաբերյալ Իսրայելի ենթադրյալ համաձայնության մասին։
«Channel 13 հեռուստաալիքի հաղորդումն այն մասին, թե Իսրայելը համաձայնել է Գազայի հատվածում ռազմական գործողությունների դադարեցմանը, սուտ է: Դրանք պոլիոմիելիտի դեմ պատվաստման համար մարտական գործողությունների դադարներ չեն, այլ միայն (դրա համար) որոշակի վայրերի հատկացում Գազայի հատվածում», – հայտարարել է վարչապետի գրասենյակը։
Գազայի հատվածում պոլիոմիելիտի առաջին դեպքը գրանցվել է օգոստոսի 16-ին։ ԱՀԿ-ն և ՅՈՒՆԻՍԵՖ-ը համատեղ հայտարարությամբ հայտնել են Գազայում պոլիոմիելիտի դեմ պատվաստման երկփուլ արշավի մասին։ ՄԱԿ-ը 11 բժշկական կենտրոններում նախապատրաստական աշխատանքներ է իրականացնում, որպեսզի այնտեղ անցկացվեն պատվաստումներ։ Պաղեստինի Կարմիր մահիկի ընկերությունը հայտնել է, որ պատվաստումների առաջին փուլը կսկսվի օգոստոսի 31-ին:
