Անդրանիկ Քոչարյանի վտանգավոր հայտարարությունը
Civic.am–ին տված հարցազրույցում ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն անդրադարձել է վերջերս Սիսիանում ադրբեջանցիների հայտնվելու փաստին, որոնցից միայն մեկին են դեռ հայտնաբերել:
Նա միամտություն է համարել միայն այն վարկածի դիտարկումը, թե ադրբեջանցիները մոլորվել են: Իսկ ավելի վաղ լրագրողներից մեկի հարցերին պատասխանելիս՝ Անդրանիկ Քոչարյանն ակնարկել էր, թե դեռ պետք է պարզել՝ ադրբեջանցի զինվորները Հայաստանի տարածք են մտել ինչ-որ գործողություն անելո՞ւ համար, թե՞ փախել են զորամասից:
Իսկ Civic.am-ին տված հարցազրույցում իշխանական պատգամավորը նշել է, որ ադրբեջանցիները զինվորականներ են և կարող են իրենք կապի դուրս գալ ՀՀ ուժային կառույցների հետ:
Քոչարյանը լավագույն լուծում է համարել Սիսիան մտած ադրբեջանցիների փոխանակումը հայ գերու կամ գերիների հետ:
Հակադարձմանը՝ արդյո՞ք վտանգ չկա այս դեպքում, որ երբ մերոնք մոլորվեն, իսկ նման դեպքեր եղել են, Ադրբեջանը չվերադարձնի մեր մոլորված զինծառայողներին, ինչին Անդրանիկ Քոչարյանը բառացի պատասխանել է.
«Մեր զինվորականները երբեք չպետք է մոլորվեն, պետք է բացառվեն այդպիսի դեպքերը: Շատ դեպքերում չեն մոլորվում, շատ դեպքերում ինչ-ինչ հանգամանքներից ելնելով՝ լքում են զորամասը և գնում են, հետո փորձ են անում այդ ճանապարհով հայտնվել 3-րդ երկրում: Այդպիսի դեպքեր եղել են մեր կողմից, երբ զինվորականները գնացել և հայտնվել են նրանց մոտ»:
Ասվածից մի քանի հարց է ծագում
Նախ, ԱԺ պաշտպանության հարցերի հանձնաժողովի նախագահը արդյոք տիրապետո՞ւմ է վիճակագրության, երբ հայ զինվորականները ավելի շատ լքել են զորամասը, քան թե մոլորվել, և այն էլ՝ երրորդ երկիր տեղափոխվելու մտադրությամբ:
Երկրորդ, արդյո՞ք սրանից կարելի է ենթադրել, որ մեր բանակում այնպիսի պայմաններ են, որ զինծառայողները նախընտրում են լքել հայկական զորամասի տարածքը և հայտնվել թշնամու վերահսկողության ներքո՝ երրորդ երկիր տեղափոխվելու հեռահար նպատակով:
Երրորդ, Անդրանիկ Քոչարյանը կարո՞ղ է ասել՝ 3-րդ երկիր տեղափոխվելու մտադրություն ունեցող քանի դեպք կամ ցանկություն հայտնող է եղել Բաքվում պահվող մեր գերիներից, քանի որ նման որևէ գործընթացի մասին հրապարակային ոչ մի տեղեկություն չկա, և, մասնավորապես, 44-օրյա պատերազմից հետո մեր գերիները կամ դատապարտվել են Բաքվում, կամ սպանվել, կամ ականապատ տարածքների քարտեզների դիմաց վերադարձվել են:
Չորրորդ, Անդրանիկ Քոչարյանը, որ հստակ պահանջում է՝ հայ զինվորականները չպետք է մոլորվեն, միգուցե ասի՝ 44-օրյա պատերազմից հետո ստեղծված իրավիճակում, այսօրվա դիրքերի, բնագծերի, մարտական հերթապահության համար ստեղծված պայմաններում և հատկապես ձմռանը, հնարավո՞ր է առհասարակ չմոլորվել և չհայտնվել թշնամական վերահսկողության տակ:
Հինգերորդ, իշխանական պատգամավորը չի՞ հիշում, թե ինչպես են հայ զինծառայողները ՀՀ ինքնիշխան տարածքում գերի վերցվել, երբ չկրակելու հրաման էր տրված, հենց 2021 թվականի մայիսին ադրբեջանական ներխուժումների ժամանակ:
Վեցերորդ, Անդրանիկ Քոչարյանը չի՞ լսել Ադրբեջանի կողմից հայ զինվորականների և քաղաքացիական անձանց առևանգումների մասին՝ չեզոք գոտուց:
Յոթերորդ, իշխանական պատգամավորը, թերևս, չի լսել ադրբեջանցի զինվորականների՝ զորամասը ինքնակամ լքելու, ինչպես նաև քաղաքացիական անձանց հայկական կողմ անցնելու մասին, որոշ դեպքերում՝ 3-րդ երկիր տեղափոխվելու մտադրությամբ:
Այս շարքը կարող եմ շարունակել՝ որպես երկար տարիներ գերիների փոխանակման և հանձնման դեպքերը լուսաբանած լրագրող:
Իհարկե չենք բացառում, որ հայկական բանակի զորամասն ինքնակամ լքելու դեպքեր եղել են, բայց կարծում ենք՝ ժամանակին պաշտպանության փոխնախարար, այսօր Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը պետք է լավ իմանա, որ նման դեպքերի մասին խոսելիս շատ ավելի զգույշ պետք է լինել, նախ՝ բանակի հեղինակությանը չվնասելու, և երկրորդ՝ հերթական շահարկման համար թշնամուն առիթ չտալու համար:
