«Խաղաղության մարտիկ» միջազգային մրցույթում որոշվել է «Աթլետ» մրցաձևի հաղթողը
«Խաղաղության մարտիկ» միջազգային մրցույթի շրջանակում օգոստոսի 16-ին և 17-ին երկու մրցափուլով անցկացվել է ռազմամարզական «Աթլետ» մրցաձևը:
Ինչպես տեղեկացրին ՀՀ պաշտպանության նախարարությունից, մրցութային առաջին օրը զորամասերից մեկի տարածքում մասնակիցներն ուժերն են չափել վազք 100 մետր, նռնակի նետում՝ դիպուկության և հեռահարության հաշվառմամբ վարժաձևերում: Երկրորդ օրը հավաքական թիմերի անդամները ձգումներ են կատարել պտտաձողի վրա, ապա հաղթահարել սահմանված չափորոշիչներով կահավորված արգելագոտին:
Ըստ աղբյուրի՝ երկօրյա մրցումների արդյունքների համադրմամբ «Աթլետ» մրցաձևում ընդհանուր հաշվարկով հաղթող է ճանաչվել Բելառուսի թիմը: Երկրորդ տեղում Ղազախստանն է: Ռուսաստանի Դաշնության զինված ուժերի թիմը եզրափակել է ուժեղագույն եռյակը:
Կանանց անհատական հաշվարկում ՀՀ զինված ուժերի թիմը ներկայացնող կապիտան Արմինե Գրիգորյանը տվյալ մրցաձևում երկրորդն է:
