Apple-ն անվճար կվերանորոգի iPhone 12 շարքի վնասված մոդելները
Եթե գիտեք, որ ձեր սմարթֆոնը բարձրախոսի խնդիր ունի, ժամանակն է պլանավորել ուղևորություն դեպի ընկերության սպասարկման կենտրոն: Նրանք խոստանում են շտկել այն անվճար, սակայն այս առաջարկը չի գործում iPhone-ների բոլոր սեփականատերերի համար։
Համաձայն Apple-ի պաշտոնական կայքի տվյալների՝ 2020 թվականի հոկտեմբերից մինչև 2021 թվականի ապրիլը թողարկված միայն iPhone 12 և iPhone 12 Pro մոդելները կարող են օգտվել անվճար վերանորոգման ծրագրից։ Ընկերությունն առանձին պարզաբանել է, որ iPhone 12 mini-ն և iPhone 12 Pro Max-ը չեն կարող մասնակցել ծրագրին։
Առաջարկը գործում է ամբողջ աշխարհում։ «Խուլ» սմարթֆոնի հետ կապված խնդիրը լուծելու համար անհրաժեշտ է դիմել Apple-ի լիազորված ծառայությանը: Ձեր սարքը նախքան վերանորոգումը կստուգվի անվճար վերանորոգման ծրագրին համապատասխանության համար: Ընկերությունն իրավունք ունի սահմանափակել սպասարկումը՝ կախված գաջեթի գնման երկրից կամ տարածաշրջանից:
Եթե ձեր iPhone 12-ը կամ iPhone 12 Pro-ն որևէ վնաս ունի, որը թույլ չի տալիս Apple-ին վերանորոգել (օրինակ՝ էկրանի կոտրվածք), դուք պետք է շտկեք խնդիրը մինչև սպասարկումը: Որոշ դեպքերում կարող են կիրառվել լրացուցիչ վերանորոգման վճարներ:
Ինչպես նշում են օգտատերերը, բարձրախոսի հետ կապված խնդիրը դրսևորվում է հետևյալ կերպ՝ զանգերի ժամանակ սմարթֆոնի ձայնը չի լսվում։ Apple-ը խոստովանել է, որ այս իրավիճակը արտադրական թերության արդյունք է։ Խնդիրը լուծվում է խոսակցական բարձրախոսի փոխարինմամբ։
Հիշեցնենք, որ iPhone 12-ը և iPhone 12 Pro-ն ներկայացվել են 2020 թվականի հոկտեմբերի 13-ին։ Դրանք Apple-ի առաջին սերնդի սմարթֆոնների մի մասն են, որոնք աջակցում են 5G բջջային ստանդարտին:
Սիրարփի Աղաբաբյան
