Կգերակշռի առանց տեղումների եղանակը. մանրամասնում է Գագիկ Սուրենյանը
Հանրապետությունում առաջիկա օրերին որևէ լուրջ եղանակակլիմայական տատանումներ չեն կանխատեսվում:
«Արմենպրես»-ի մամուլի սրահում հրավիրված ասուլիսում «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի տեղակալ Գագիկ Սուրենյանը նշեց, որ հանրապետությունում կարճատև անձրևները կշարունակվեն մինչև նոյեմբերի 5-ի գիշերը:
«Նոյեմբերի 5-ից սկսած ցիկլոնը, որն արդեն 4-5 օր պտտվում է մեր երկրի վրա, դուրս կգա մեր հանրապետությունից՝ իր տեղը զիջելով անտիցիկլոնային դաշտին: Նոյեմբերի 5-ից սկսած տեղումները հանրապետության ամբողջ տարածքում կդադարեն: Հանրապետության ամբողջ տարածքում կգերակշռի առանց տեղումների եղանակը»,- ասաց Գագիկ Սուրենյանը՝ ավելացնելով, որ նոյեմբերի 6-ից էլ կսկսվի եղանակի պարզվելու պրոցեսը:
Ինչ վերաբերում է օդի ջերմային ֆոնին, ապա, Գագիկ Սուրենյանի գնահատմամբ, առաջիկա 6-7 օրերին հանրապետության տարածք ցուրտ օդային հոսանքների ներթափանցում չի կանխատեսվում: Ներկայում հանրապետությունում օդի ջերմաստիճանը կլիմայական նորմայից բարձր է 2-3 աստիճանով: Նման ջերմային ֆոնը առանց լուրջ տատանումների կպահպանվի առաջիկա 5-7 օրերին:
