Օլիմպիական խաղերն ինձ համար ահռելի փորձ են լինելու. Վարսենիկ Մանուչարյան
Հայաստանի օլիմպիական հավաքականի ամենակրտսեր անդամը 17-ամյա լողորդ է: «Արմենպրես»-ի հեղինակային «Երազանքի ճանապարհը` Տոկիո-2020» նախագծի հերոսը նա է՝ Վարսենիկ Մանուչարյանը: Նա ծնվել է Երևանում 2003 թվականին: Վարսենիկն իր ուժերը կփորձի 100 մետր ազատ ոճում: Նա Օլիմպիական խաղերին մասնակցում է «Սպիտակ քարտ»-ով:
-Վարսենիկ, ինչպե՞ս եք սկսել հետաքրքրվել լողով:
-Անկեղծ, որոշումը իմը չի եղել: Տատիկս որոշել է ու ինձ տարել լողի: Բայց ի սկզբանե հետաքրքրված էի թենիսով, սակայն այդ ժամանակ իմ տարիքային խմբում ազատ տեղ չի եղել: Եկել եմ լողի, ու իմ առաջին մարզիչը Այժեմնիկ Մինասյանն է եղել: Արագ եմ սկսել լողալ սովորել. սկսելուց մի քանի ամիս անց արդեն լողում էի: Երբ տատիկս և մայրիկս տեսան, որ լողում եմ, որոշեցին, որ կշարունակեմ այս մարզաձևում:
-Դուք ընդամենը 17 տարեկան եք և մասնակցելու եք Օլիմպիական խաղերին: Ի՞նչ եք ակնկալում:
-Այս Օլիմպիական խաղերն ինձ համար ահռելի փորձ են լինելու: Գիտակցում եմ, որ առավել ուժեղ և լուրջ լողորդների հետ եմ մրցելու: Հույս ունեմ, որ այս խաղերի փորձն ինձ կօգնի հաջորդ` Փարիզի Օլիմպիական խաղերին առավել լավ հանդես գալ:
-Ի՞նչ հետաքրքրություններ ունեք լողից դուրս:
-Տարօրինակ կհնչի, բայց սիրում եմ ըմբշամարտն ու ծանրամարտը: Միշտ հետևում եմ մեր մարզիկների ելույթներին միջազգային մրցաշարերում: Ինքս երկար տարիներ զբաղվել եմ նաև վոլեյբոլով: Հիմա սովորում եմ Օլիմպիական հերթափոխի մարզական քոլեջում: Այն կարծիքին եմ, որ մարզիկների համար կարևոր է նաև կրթությունը:
-Հիմա այդ նույն մարզիկների հետ նույն հավաքականում եք լինելու:
-Այո, այո: Դրա համար շատ ուրախ եմ, քանի որ մեծ հիացմունք ունեմ Արթուր Ալեքսանյանի նկատմամբ: Նա իմ ամենասիրելի մարզիկն է: Լոնդոնի Օլիմպիական խաղերում, երբ 3-րդն էր, իր համար շատ էի տխրել: Վստահ էի, որ Ռիոյի խաղերում կհաղթի:
-Բնութագրեք խնդրեմ Օլիմպիական խաղերը մեկ բառով:
-Երազանք:
– Մի քանի բլից հարցեր. լե՞ռ, թե՞ ծով:
– Ծով:
– Թո՞մը, թե՞ Ջերին:
– Թոմը:
– Նարդի՞, թե՞ շախմատ:
– Նարդի:
– Դոլմա՞, թե՞ խորոված:
– Խորոված:
– Պիցցա՞, թե՞ պաղպաղակ:
– Պաղպաղակ:
– Գի՞րք, թե՞ ֆիլմ:
– Ֆիլմ:
– Սո՞ւրճ, թե՞ թեյ:
-Սուրճ:
– Բատերֆլա՞յ, թե՞ թիկնալող:
-Բատերֆլայ:
– Շնորհակալ եմ զրույցի համար, հուսով եմ՝ արդեն մեդալներով զրույց կունենանք Տոկիոյում:
