Տեխնոլոգիական ոլորտի լիդերները կքննարկեն` կրթության և որակյալ աշխատուժ ձեռք բերելու խնդիրները
Հոկտեմբերի 12-14-ը Հանքավանի «Անի Ռեզորթ» հանգստյան տանը տեղի կունենա «ՏՀՏ լիդերների հանդիպում» ֆորում` նվիրված տեխնոլոգիական ոլորտի կրթական և աշխատուժի զարգացման խնդիրներին: Այս մասին 168.am-ին տեղեկացնում են Ինֆորմացիոն տեխնոլոգիաների ձեռնարկությունների միությունից: Ֆորումին կմասնակցեն ՏՀՏ հայաստանյան ընկերությունների, համալսարանների և այլ կրթական հաստատությունների, կրթության և գիտության, էկոնոմիկայի նախարարությունների, միջազգային կազմակերպությունների և մամուլի շուրջ 70 ներկայացուցիչներ։
Օրակարգային թեմաներից են`
- Հայկական ազգային ինժեներական լաբորատորիայի ներկայացում
- Ծրագրային ապահովման գերազանցության կենտրոնի ստեղծման անհրաժեշտություն
- Հայաստանում տեխնոլոգիական ոլորտի կրթական ծրագրերի ներկայացում
- Մասնավոր տեխնոլոգիական ընկերությունների կոնսոլիդացիա կրթական ծրագրերի շուրջ
- ՀՀ դպրոցներում ռոբոտաշինության խմբակների ստեղծում և այլն:
Նշենք, որ հանդիպմանն ավանդաբար աջակցում է ԱՄՆ Միջազգային զարգացման գործակալության «Ձեռնարկությունների զարգացման և շուկայի մրցունակության» ծրագիրը: Ծրագիրը նպատակային աջակցություն է ցուցաբերում բարձր տեխնոլոգիաների ոլորտի փոքր և միջին ձեռնարկություններին կրթական խնդիրների արդյունավետ լուծման ուղղությամբ:
