Իտալիայում առաջարկում են շենքերն ախտահանել ուլտրամանուշակագույն լամպերով
Ուլտրամանուշակագույն ճառագայթումը նույնիսկ ոչ մեծ դոզաներով ի վիճակի է ոչնչացնելու կորոնավիրուսը: Մի խումբ իտալացի գիտնականներ՝ Միլանի համալսարանի իմունաբանության պրոֆեսոր Մարիո Կլերիչիի գլխավորությամբ հանգել են այն եզրակացության, որ վիրուսի տարածման աստիճանն ուղղակիորեն կախված է երկարալիքային եւ միջինալիքային(UVA, UVB) ընդգրկույթի ուլտրամանուշակագույնի ինտնեսիվությունից:
Հետազոտողները, որոնց թվում եղել են աստղաֆիզիկոսներ, հունվարի կեսերից մինչեւ մայիսի վերջը թեստավորել են արեգակնային ճառագայթումը 260 երկրներում: Արդյունքնում նրանք պարզել են, որ ուլտրամանուշակագույն ճառագայթման ավելի նվազ մակարդակով վայրերում ախտահարվածների ավելի մեծ թիվ է դիտարկվում:
Մասնավորապես, Կլերիչին հակված է Իտալիայում կորոնավիրուսի տարածման տեմպերի նվազումը բացատրելու ամռան շրջանի սկսվելով: Թեստերի ընթացքում ուղիղ ճառագայթների ներգործության են ենթարկվել կորոնավիրուսով հիվանդներից վերցված նյութեր: Արդյունքը եղել է այսպես. ոչնչացում 99,9 տոկոսով:
Դա գիտնականներին թույլ է տվել պնդել, որ ուլտրամանուշակագույն լամպերի միջոցով կարելի է ախտահանել փակ շենեքրը՝ նոր կորոնավիրուսի հարուցած հիվանդության տարածման կանխարգելման համար:
«Նման լամպերը թույլ են տալիս ախտահանում իրականացնել նվազագույն ուլտրամանուշակագույն ճառագայթմամբ եւ կարճագույն ժամկետներում: Այդ մեթոդը կարող է կիրառվել կինոթատրոններում, գրասենյակներում, խանութներում, եւ դպրոցներում»,- ասել է պրոֆեսորը: Սակայն բժիշկները խորհուրդ չեն տալիս ուլտրամանուշակագույնի ներգործություն թույլ տալ մաշկի բաց հատվածների վրա, քանի որ կարելի է այրվածք ստանալ կամ վնասել տեսողությունը, հաղորդել է ՏԱՍՍ-ը:
