Հովիկ Աբրահամյանն ընդունեց ԳԴՀ Բունդեսթագի փոխնախագահին
Հոկտեմբերի 1-ին ՀՀ ԱԺ նախագահ Հովիկ Աբրահամյանն ընդունել է ԳԴՀ Բունդեսթագի փոխնախագահ Վոլֆգանգ Թիրզեին:
Այս մասին տեղեկացնում է ՀՀ ԱԺ հասարակայնության հետ կապերի վարչությունը:
Հ. Աբրահամյանը բարձր է գնահատել հայ-գերմանական հարաբերությունների ներկա մակարդակը` նշելով, որ Գերմանիայի հետ քաղաքական երկխոսությունը կարևորվում է ինչպես երկկողմ, այնպես էլ բազմակողմ ձևաչափերով: Աբրահամյանն ընդգծել է միջխորհրդարանական կապերի զարգացման կարևորությունը, փոխայցելությունների, շփումների, պատգամավորական բարեկամական խմբերի գործունեության ակտիվացման անհրաժեշտությունը:
Բունդեսթագի փոխնախագահը նույնպես կարևորել է միջխորհրդարանական գործակցության զարգացման անհրաժեշտությունը` շեշտելով, որ Գերմանիայի խորհրդարանը մեծապես շահագրգիռ է խորացնել և ամրապնդել Հայաստանի խորհրդարանի հետ փոխգործակցությունը: Նա կարևոր է համարել ուղիղ շփումների ակտիվացումը, որպեսզի գերմանացի պատգամավորների մոտ Հայաստանի և տարածաշրջանի խնդիրների մասին ճիշտ պատկերացումներ ձևավորվեն:
Երկուստեք կարևորվել է Բունդեսթագի կողմից հովանավորվող Միջազգային խորհրդարանական կրթաթոշակ ծրագիրը և դրա շարունակականությունը: Հանդիպման ընթացքում անդրադարձ է եղել Հայաստանի ներքաղաքական իրավիճակին, քննարկվել են երկկողմ հետաքրքրություն ներկայացնող այլ հարցեր ևս:
