«Ո՞րն է երաշխիքը, որ Դավիթի հետ եղածը այլ ուսանողի հետ չի պատահի». Շուլի Հակոբյան
Ապրիլյան քառօրյա պատերազմի հերոս Շուլի Հակոբյանը ֆեյսբուքյան իր էջում գրում է.
«Դավիթ Ափոյանը իմ ընկերն է: Ինքը ուժեղ մարդ է, վստահ եմ երեկ տեղի ունեցածը առանձնապես մեծ բան չէր իր համար: Դավիթը նույնիսկ աջակցության կարիք էլ առանձնապես չունի: Որպես ընկեր ինձ հանգիստ եմ զգում:
Բայց խնդիրն այն է, որ ոչ բոլորն են պարտավոր Դավիթի պես ուժեղ լինել: Խնդիրն այն է, որ նման իրավիճակում հայտնվելով՝ շատերը հաստատ կկոտրվեին, ընկնելով դժվար ապրումների մեջ: Բայց ո՞րն է երաշխիքը, որ Դավիթի հետ եղածը այլ ուսանողի հետ չի պատահի:
ԵՊՀ-ն ակադեմիական տարածք պետք է լինի: Այստեղ ցանկացած արտաքին անօրինական միջամտությունը պետք է ԵՊՀ ղեկավարության կողմից կանխվի: Բայց ի՞նչ անել, եթե դեպքը արդեն տեղի է ունեցել: Ինչպե՞ս է ԵՊՀ-ն հետագայում փորձելու կանխել նման միջադեպերը: ԵՊՀ-ն՝ որպես մեկ ամբողջություն, ի՞նչ դիրքորոշում ունի այս հարցում:
Վաղը Հոգաբարձուների խորհրդի հերթական նիստն է: Երեք ամիս առաջ ընտրվել եմ Խորհրդի անդամ և պատրաստվում եմ վաղը բարձրաձայնել այս խնդրի մասին: Կարծում եմ ԵՊՀ-ն Հոգաբարձուների խորհրդի մակարդակով պետք է դատապարտի տեղի ունեցածը, պահանջի մեղավորների բացահայտում և պատժում, ինչպես նաև ստեղծի մեխանիզմներ նման երևույթները ապագայում բացառելու համար»:
Հիշեցնենք, որ ԵՊՀ ուսանողական խորհրդի նախագահ Դավիթ Ափոյանը բերման էր ենթարկվել դեկտեմբերի 24-ին, համալսարանում գտնվող իր աշխատասենյակից: Ափոյանը ոստիկանության բաժանմունքում վկայի կարգավիճակով հարցաքննվելուց հետո դուրս է եկել բաժանմունքից:
