Հոնկոնգում ոստիկանությունը արցունքաբեր գազ է կիրառել բողոքավորներին ցրելու համար
Հոնկոնգի ոստիկանությունը հոկտեմբերի 25-ի երեկոյան արցունքաբեր գազ է կիրառել Մոնգ-Կոկի եւ Շատինի շրջաններում բողոքի հակակառավարական ակցիաները ցրելու համար: Այդ մասին հայտնել է RTHK հեռուստառադիոհաղորդումների կորպորացիան:
Բողոքողները փողոցներ են դուրս եկել եւ առեւտրական կենտրոններում հավաքվել դեռ Սուրբծննդյան ճրագալույցին՝ կազմակերպելով բազմաթիվ երթեր, խանութների բազմաթիվ ավերումներ, հրկիզումներ: Ցույցերի մասնակիցներն արգելափակում են փողոցները, կոտրում լուսացույցները, հարձակվում անցորդների վրա, հրկիզիչ խառնուրդով շշեր նետում ոստիկանության աշխատակիցների վրա:
Իրենց հերթին բողոքողները ոստիկանությանը մեղադրում են դաժան վերաբերմունքի եւ բողոքավորներին ցրելու համար անհամաչափ ուժ կիրառելու մեջ:
Հոնկոնգի վարչակազմի ղեկավար Քերրի Լեմը դժգոհություն է հայտնել բողոքավորների գործելակերպից, հայտարարելով, որ տեղի բնակիչները եւ տոներին քաղաք եկած բազմաթիվ զբոսաշրջիկներ հիասթափված են այն բանից, որ տոնակատարությունը մթագնվել է «մի խումբ եսամոլ ու անգիտակից բողոքողների» վարքագծի պատճառով:
Բողոքի զանգվածային ցույցերը Հոնկոնգում սկսվել են հունիսի սկզբին՝ արտահանձնման մասին օրենքում փոփոխություններ մտցնելու իշխանությունների որոշման պատճառով: Լայնածավալ բողոքի ակցիաներից հետո Հոնկոնգի իշխանությունները զիջումների գնացին, և հոկտեմբերի սկզբին օրինագիծն ամբողջությամբ հետ կանչվեց: Կես տարվա ընթացքում Հոնկոնգում անցկացվել է ավելի քան 900 ցույց, բողոքի ակցիա, և այդ ընթացքում ավելի քան 5.8 հազար մարդ է ձերբակալվել, տարբեր հոդվածներով մեղադրանքներ են առաջադրվել ակցիաներիի 932 մասնակցի:
