Վրաստանում Իրանի դեսպանի գրառումը դիվանագիտական սկանդալ է առաջացրել
Վրաստանում Իրանի դեսպան Սեյեդ Ալի Մոջանին իր ֆեյսբուքյան գրառմամբ դիվանագիտական սկանդալ է առաջացրել։
Դիվանագետն Իրանի դեսպանատան շենքի ճակատին տեղադրել է վրաց թագուհի Քեթևանի պատկերը և հայտարարել, որ շուտով կներկայացնի այս պատմական անձի վերաբերյալ իր նախնական հետազոտության արդյունքները։
Դեսպանի գործողությունները խիստ վրդովմունք են առաջացրել Վրաստանի խորհրդարանի անդամների շրջանում։ Արտաքին հարաբերությունների խորհրդարանական հանձնաժողովի նախագահ Նիկոլոզ Սամխարաձեն խորհուրդ է տվել Իրանի դեսպանին պահպանել դիվանագիտական արարողակարգը և զերծ մնալ պատմական հարցերի շուրջ մեկնաբանություններից։
«Ես խորհուրդ եմ տալիս դեսպանին շատ չխորանալ պատմական էքսկուրսիաների մեջ, քանի որ դա նրա գործը չէ։ Եթե նա ցանկանում է պահպանել երկու երկրների միջև նորմալ հարաբերություններ, ապա պետք է զերծ մնա նման հայտարարություններից», – հավելել է նա։
Հանձնաժողովի նախագահը նշել է, որ հարցը կքննարկվի Վրաստանի արտաքին գործերի նախարար Մակա Բոճորիշվիլիի հետ։
Իշխող «Վրացական երազանք» կուսակցության պատգամավորներ Իրաքլի Կադագիշվիլին և Ալուդա Գուդուշաուրին նույնպես հայտարարել են, որ Իրանի դեսպանի հրապարակումը վեր է նրա լիազորություններից։
Պատգամավորները շեշտել են, որ Վրաստանի ԱԳՆ-ն անպայման կարձագանքի այս հարցին։
