ԱՄՆ-ն 42 անգամ խախտել է փոխըմբռնման հուշագիրը. ՄԱԿ-ում Իրանի մշտական ներկայացուցիչ
Իրանը գրանցել է փոխըմբռնման հուշագրի առնվազն 42 էական խախտում Միացյալ Նահանգների կողմից: Այս մասին ասվում է նամակում, որը ՄԱԿ-ում Իրանի մշտական ներկայացուցիչ Ամիր Սայիդ Իրավանին հղել է համաշխարհային կազմակերպության գլխավոր քարտուղարին և Անվտանգության խորհրդի նախագահին։
«Իրանի Իսլամական Հանրապետությունը փաստաթղթերով հիմնավորել է Իսլամաբադի փոխըմբռնման հուշագրի բացահայտ և էական խախտման 42 դեպք Միացյալ Նահանգների կառավարության կողմից», – փաստաթղթից հատված է մեջբերում ՏԱՍՍ-ը:
Իրանցի դիվանագետը նշել է, որ «հուշագրի ստորագրումից գրեթե անմիջապես հետո և մինչ օրս» Միացյալ Նահանգները մշտապես խախտել է իր պարտավորությունները։
«ԱՄՆ-ն ագրեսոր է, այլ ոչ թե զոհ, – ընդգծվում է նամակում: – Խաղաղ բնակչության և քաղաքացիական ենթակառուցվածքների դեմ կանխամտածված հարձակումներն իրենցից ներկայացնում են ռազմական հանցագործություններ և մարդկության դեմ հանցագործություններ»։
Միացյալ Նահանգները և Իսրայելը պատերազմ են սկսել Իրանի դեմ փետրվարի 28-ին: Հունիսի 18-ին Վաշինգտոնը և Թեհրանը ստորագրել են փոխըմբռնման հուշագիր, որը նախատեսում է մարտական գործողությունների անհապաղ դադարեցում բոլոր ճակատներում, այդ թվում՝ Լիբանանում։ Այնուհետև Դոհայի և Իսլամաբադի միջնորդությամբ Շվեյցարիայի Բյուրգենշտոկ հանգստավայրում տեղի են ունեցել ԱՄՆ-ի և Իրանի բանակցությունները հուշագրի իրականացման վերաբերյալ։
Սակայն հուլիսի 8-ի գիշերն ԱՄՆ-ն վերսկսել է Իրանի դեմ լայնածավալ հարվածները՝ մեղադրելով նրան ձեռք բերված համաձայնությունների պայմանների խախտման համար՝ կապված Հորմուզի նեղուցին վերաբերող կետի հետ։ Իրանի արտաքին գործերի նախարարության ներկայացուցիչ Էսմայիլ Բաղային հուլիսի 13-ին հայտարարել է, որ Թեհրանը երբեք չի խախտել ԱՄՆ-ի հետ ստորագրված հուշագիրը, իսկ դրա չկատարման ամբողջ պատասխանատվությունը կրում է Վաշինգտոնը:
Կողմերի միջև ինտենսիվ հարվածներ են ընթանում արդեն չորս օր շարունակ։ ԱՄՆ-ն թիրախավորում է Իրանում տարբեր օբյեկտներ, Թեհրանն էլ հարվածներ է հասցնում տարածաշրջանի երկրներում ամերիկյան թիրախների։
