Ալբանիայում Թրամփի փեսայի էլիտար նախագծի դեմ բողոքի ցույցերը վերածվել են ոստիկանության հետ բախումների
Ալբանիայի մայրաքաղաք Տիրանայում հինգշաբթի բախումներ են տեղի ունեցել ոստիկանության և հակակառավարական բողոքի ակցիայի մասնակիցների միջև, որոնք վերածվել են բռնության՝ ԱՄՆ նախագահ Դոնալդ Թրամփի փեսա Ջարեդ Քուշների հետ կապված էլիտար կառուցապատման նախագծի դեմ շարունակվող ցույցերի ֆոնին. հայտնում է Associated Press-ը։
Ոստիկանության տվյալներով՝ իրավապահ մարմինների աշխատակիցները արցունքաբեր գազ և պղպեղի սփրեյ են կիրառել, երբ ցուցարարները սկսել են քարեր, ձվեր և այլ առարկաներ նետել նրանց վրա։ Անկարգություններին ի պատասխան ձերբակալվել է 18 մարդ, 12 ոստիկան ստացել է տարբեր աստիճանի վնասվածքներ։
Ակցիան դարձել է արդեն ավելի քան մեկ ամիս շարունակվող ամենօրյա բողոքի ցույցերի մի մասը, որոնք ստացել են «ֆլամինգոների հեղափոխություն» անվանումը։ Դրանք սկսվել են ափամերձ գոտում շքեղ հանգստավայրի կառուցման ծրագրերի պատճառով, որը, քննադատների պնդմամբ, կարող է վնասել էկոլոգիապես զգայուն տարածքը։
Ի սկզբանե բողոքի ցույցերը կապված էին կառուցապատման նախագծից բխող էկոլոգիական մտահոգությունների հետ, սակայն հետագայում դրանք ընդլայնվեցին և ավելի լայն քաղաքական բնույթ ստացան՝ ներառելով Ալբանիայի կառավարության և վարչապետ Էդի Ռամայի հրաժարականի պահանջները։
Վերջին շաբաթներին հազարավոր մարդիկ են դուրս եկել փողոցներ՝ օգտագործելով սուլիչներ և պաստառներ՝ ֆլամինգոների (պաշտպանվող չվող թռչունների տեսակ) պատկերներով, որոնց բնակության վայրերը կարող են վտանգվել Ադրիատիկ ծովի ափին գտնվող Նարտա ծովալճակի շրջանում։
Ալբանիայի կառավարությունը հայտարարում է, որ կառուցապատման նախագիծը կարող է նպաստել պրեմիում դասի զբոսաշրջության զարգացմանը և արագացնել երկրի ինտեգրումը Եվրոպական Միությանը։ Սակայն նախաձեռնությունը, որը ներառում է լքված կղզու և հարակից ափամերձ տարածքների յուրացումը, արժանանում է էկոլոգների և կառավարության ընդդիմադիրների քննադատությանը։
Տիրանայում խորհրդարանի շենքի մոտ անցկացված ակցիայի ժամանակ ցուցարարների մի մասը քարեր, ձվեր և պլաստիկե շշեր է նետել ոստիկանների ուղղությամբ, ինչպես նաև վնասել է ծառայողական ավտոմեքենան՝ մետաղական կոնստրուկցիաներով ջարդելով դրա ապակիները։ Ամբոխը ցրելու համար ոստիկանությունը կիրառել է գազ, պղպեղի սփրեյ և ջրցան մեքենաներ։
Ներքին գործերի նախարար Բեսֆորտ Լամալարին դատապարտել է բռնությունը՝ հայտարարելով, որ ոստիկանության աշխատակիցների վրա հարձակումները հարված են պետությանը և հասարակական կարգին։
