ՆԱՏՕ-ի անդամ եվրոպական երկրները գրեթե ամբողջությամբ փոխհատուցել են ԱՄՆ ռազմական կարողությունների կրճատումը. Reuters
ՆԱՏՕ-իանդամ եվրոպական երկրները գրեթե ամբողջությամբ լրացրել են ռազմական կարողությունների դեֆիցիտը, որն առաջացել էր դաշինքին հատկացվող ուժերի և միջոցների ծավալը կրճատելու ԱՄՆ որոշումից հետո, հաղորդում է Reuters գործակալությունը՝ հղում անելով ՆԱՏՕ-ում իր աղբյուրին։
Ըստ աղբյուրի՝ դրա մասին նախատեսվում է պաշտոնապես հայտարարել ՆԱՏՕ-ի գագաթնաժողովում, որը տեղի կունենա հուլիսի 7–8-ին Անկարայում։ Միաժամանակ, ամենալուրջ չլուծված խնդիրը մնում է ռազմավարական ռմբակոծիչների պակասը. երկու ինքնաթիռի փոխարեն ԱՄՆ-ն պատրաստ է դաշինքին տրամադրել միայն մեկը։
Մայիսին Վաշինգտոնը տեղեկացրել էր դաշնակիցներին ճգնաժամի դեպքում ՆԱՏՕ-ին հատկացվող ռազմական կարողությունների ցանկը կրճատելու որոշման մասին։ Ինչպես ավելի վաղ հայտարարել էր Եվրոպայում ՆԱՏՕ-ի միավորված զինված ուժերի գերագույն գլխավոր հրամանատար, ԱՄՆ ռազմաօդային ուժերի գեներալ Ալեքսուս Գրինկևիչը, այդ քայլն ուղղված է ամերիկյան զինված ուժերից դաշինքի կախվածության աստիճանական նվազեցմանը՝ մի քանի ռազմաբեմերում միաժամանակյա հակամարտությունների ռիսկի ֆոնին։
Reuters-ի աղբյուրի տվյալներով՝ կրճատումներն անդրադարձել են ռազմական միջոցների լայն շրջանակի վրա։ ՆԱՏՕ-ի համար հասանելի F-15 և F-15E կործանիչների քանակը կնվազի մոտ մեկ երրորդով՝ հասնելով 99 միավորի, իսկ MQ-4 և MQ-9 Reaper անօդաչու թռչող սարքերի թիվը կկրճատվի կիսով չափ՝ հասնելով 12-ի։ Կնվազի նաև KC-135 և KC-46 օդանավ-լիցքավորիչների քանակը՝ 79-ից հասնելով 63-ի։
Բացի դրանից, երկու ռազմավարական ռմբակոծիչների և երկու ավիակիրների փոխարեն ԱՄՆ-ն կհատկացնի մեկական միավոր։ Կրճատվում են նաև ծովային ավիացիայի, թևավոր հրթիռներով հագեցած ականակիրների և սուզանավերի գծով պարտավորությունները։
ՆԱՏՕ-ում ավելի վաղ հայտարարել էին, որ եվրոպական դաշնակիցներն ավելացնում են իրենց ներդրումը հավաքական պաշտպանության գործում՝ ամերիկյան մասնակցության կրճատումը փոխհատուցելու համար։ Այդուհանդերձ, ինչպես նշում է Reuters-ը, մի շարք եվրոպական երկրներում պահպանվում են մտահոգությունները դաշինքում ԱՄՆ ռազմական ներկայության հետագա կրճատման վերաբերյալ՝ ՆԱՏՕ-ի հանդեպ ամերիկյան պարտավորությունների հնարավոր վերանայման մասին ԱՄՆ նախագահ Դոնալդ Թրամփի արած բազմաթիվ հայտարարությունների ֆոնին։
